Komîteya Pêşîgirtina Îşkenceyê ya Ewropayê (CPT), li ser malpera xwe diyar kir ku navbera 13-22’ê Sibatê de hat Tirkiyeyê. CPT di malperê de anîbû ziman ku li Tirkiyeyê hin girtîgeh ziyaret kirine û der barê Îmraliyê de jî ji rayedarên dewletê agahî girtine. Li gel ku Rêberê PKK’ê Abdullah Ocalan 25 sal in di tecrîda giran de ye û 35 mehin tu agahî jê nayê girtin jî dîsa Heyeta CPT beyî ku Ocalan û girtiyên li gel wî ziyaret bike paşve vegeriya. CPT ku di serdana xwe de neçû Îmraliyê, der barê mijarê de got; ‘Heyet bi wesîleya serdanê, niha der barê rewşa girtiyên îmraliyê de, hinek mijar anîne rojevê.’
CPT neçû serdana Îmraliyê û vê yekê rê li bertekan vekir. 500 jin dê li diji vê helwesta CPT’yê di 27’ê Sibatê de li ber CPT çalakiyê pêk bînin. Hevseroka KCKD-E Zubeyde Zumurt ji JINNEWS’ê re axivî û da zanîn ku armaca çalakiyan wan protestokirina tecrîdê û neçûyîna Îmraliyê ye. Tê payîn ku jin dosyayekê der barê mijarê de bidin CPT’ê.
