Komela 78an kongreya xo ya neweye viraşte. Seba pîrozkerdişî dezgeyan sere danê Komela 78an ro. Dayîkanê Aştî zî seba pîrozkerdişî sere da Komela 78an ro.

Wextê zîyaretî de derheqê na rewşa neweye de Dayîka Aştî Havva Keser wina va: “Ma na rewşa neweye ra bawer nêkenê ke prosesê çareserî virazîyo. Seba ke Rojava de Tişrîn de her roje qirkerdişî û sucê merdimîye benê û ma nê tewir têhetameyîşan qebul nêkenê.”

Havva Keser îlawe kerd ke eke prosesêko newe virazîyeno ganî prosesêko birûmet bo û wina dewam kerd: “Ma bawer kenê ke aştîyêka birûmete virazîyo.” Maya aştî Nezahat Teker zî va ke Rojava de Tişrîn de çalakîya nobetî de şar çalakîya canfedayî keno. Na çalakîya canfedayî rewşêka muqedes a, coka ganî her kes na çalakîya muqedese rê wayîr vejîyo.

Wa Heyetê Îmralî ma reyde zî bêro têhet

Maya Aştî Nezahat Teker va ke Heyetê Îmralî heme partîyan reyde ame têhet û ganî înan reyde zî bêro têhet, nê warî de ê ameyê peygoşkerdene û wina qedêna: “Senî ke hesasîyetê dayîkanê şehîdanê tirkan est o, hesasîyetê dayîkanê aştî zî est o. Verê cû dayîkanê aştî bedelê girdî dayî û eke prosesêko newe dest pê keno, ganî verê cû fikrê ma zî bigîrê.”