Şubeyê Egîtîm-Senî yê Amedî qerarê Mehkemeya Qanûnê Bingeyî rexne kerd û wina vat: “Ziwanê dayîke heqo tewr bingeyên o. Astengkerdişê ziwanê dayîke binpaykerdişo tewr pîl ê heqanê merdiman o.”

Mamosteyanê Egîtîm- Senî 22ê sibata 2016î de çarçewa 21ê Sibate Roja Ziwanê Dayîke de mekteban de saetêke dersa kurdkî dabî û derheqê înan de cezaya dîsîplînî amebî dayene. Mehkemeya Qanûnê Bingeyî na ceza heqdar dîye. Şubeyê Egîtîm-Senî yê Amedî vera nê qerarî nêrazîbîyayîş mojna û vat ê nê qerarî qebul nêkenê.

Banê Egîtîm-Senî yê Yenîşehîrî de eşkerayîye ameye dayene. Îdarekaranê şubeyî ra Fesih Zîrekî vist vîrî ke endamanê înan seba ke bale biancê muhîmîya ziwanê dayîke dersa kurdkî daye û vat: “Ziwanê dayîke nasnameyê şaran o. Tena Tirkîya de 18 ziwanî binê tehlukeyê çînbîyayîşî de yê. Ziwanê dayîke heqo tewr bingeyên o. Astengkerdişê ziwanê dayîke binpaykerdişo tewr pîl ê heqanê merdiman o. Nê welatî de tena tirkî nê, kurdkî û xeylêk ziwanê bînî yenê qiseykerdene. Ganî nê ziwanan de perwerde bêro dayene. Bi qedexekerdişê ziwanan heqê merdiman yenê binpaykerdene. Rîyê na polîtîka ra bi serran o komel aver nêşino. Ganî nê qedexeyî bêrê wedaritene û heqê perwerdeyê ziwanê dayîke bêro caardene.”