Tepişteyan Bîlal Balahan, Vedat Kalin û Ferît Kaşçiyî vat ke Zîndanê Panosî de îşkence yeno kerdene.

Heyetê ÎHD, OHD û HDPyî zîndanê Îdir, Agirî û Wanî de tepişteyî zîyaret kerd û îdareyanê zîndanan de pêvînayîşî kerdî. Heyetî raporê xo yê zîyaretî zî eşkera kerd. Tepişteyanê Zîndanê Panosî ra Bîlal Balahan, Vedat Kalin û Ferît Kaşçi qala îşkenceyî kerde.

Balahanî pare kerd ke komêka gardîyanan destê ci kelemçe kerdê û vat: “Gardîyanan ez berda odayêke û milê mi di cayan ra şikit. Dima ez berda odaya sungerine û bi saetan uca de verdaya. Înan mi rê heqaret kerd, gefî wendî û vat ‘Nê hema rojê şima yê hol ê.’ Înan dima îdareyê zîndanî rê zî gerreyê ma kerd.”

Tepişte Vedat Kalinî ard ziwan ke seba ke ey vera îşkenceyê serê Balahanî tewirê xo mojna erdî ra kaş bîyo û paskilî werdê. Kalinî vat: “Înan qirikê mi tepişt û da mi ro.”

Ferît Kaşçiyî zî vat: “Çîyêko wişk eşt sereyê mi. Wexto ke mi înan rê vat ke nefes nêgêna da mi ro.”

Hemsereka ÎHDyî ya Wanî Emîne Keskîne ard ziwan ke înan tesbît kerd ke Zîndanê Panosî de şert û mercî zaf xirab ê û vat: “Goreyê vateyanê tepişteyan binpaykerdişê heqan ra heta îşkenceyî zîndan de kerdişê xirabî estê. Meseleya keyeyan zî pîl a. Bi bahaneya janî têkilîya înan a bi teberî birîyena.”