Zîndanê Bolu de tepişteyê sîyasîyî îşkence vînenê, gardîyanî erzenê koxûşan ser û dest nanê çîyanê tepişteyan ser.

Razîye Eksîka ke Zîndanê Bolu de şîya zîyaretê lajê xo Bayram Eksîkî, qala binpaykerdişê heqanê merdiman kerde.

Bayram Eksîk bi îdîaya ‘endamîya rêxistine’ 2012 de tepişîyabî û cezaya zîndanî ya 36 serran dîyabî ci. Eksîk 9 serrî yo Zîndanê Bolu de îşkence vîneno.

Dadîya ey Razîye Eksîke 4ê teşrîna verêne de şîye zîyaretê lajê xo. Razîye Eksîke wina qala zîyaretî kerde: “Pêvînayîş de tepişteyî pêro bêhal bîyî, destê înan recifîyayêne. Lajê mi vat ‘Roje de têna 2 reyî nan danê ma, şan zî arayî ra çi maneno ey danê. Destûrê sporkerdiş û vejîyayîşê warê hewayî nêdanê.’ Lajê mi vat ke înan seba ke na rewşe şermezar bikerê dayo beran ro la dima înan rê îşkence ameyo kerdene. Lajê mi vat ke înan rê tedayêka girane yena kerdene, şewe gardîyanî erzenê koxûşan ser, dest nanê kitab, qelem û kincanê înan ser. Tepişteyî pê kincanê serê xo mendê. Nika zimistan dîyeno, ê do kincê xo bişuwê senî nê kincî do ziwa bibê.”

Dayîke Eksîke îfade kerd ke lajê ci vato ke eke teda dewam bikera o pê embazanê xo do grevê vêşanîye bikero. Dayîke Eksîke da zanayene ke lajê ci û embazanê ci vera qetilkerdişê Jîna Emînî gijikê xo qesnayo û xoverdayîşê şarê Îran û Rojhelatî selam kerdo.