Tepişteyanê Zîndanê Amedî vera îşkence û binpaykerdişê heqanê merdiman seba 3 rojan grevê vêşanîye da destpêkerdene.
Tepişteyê bi nameyê Beran Ermanê 23 serrî keyeyê xo de pêvînayîşê telefonî kerd û înan rê da zanayene ke zîndan de îşkence zêdîyayo û gardîyanî her şewdirî erzenê koxûşan ser. Ermanî vato: ”Zîndan de têgêrayîşê keyfîyî zêdîyayî. Gardîyanan tepişteyî Umît Ozkan, Mehmet Kasim Aslan û Dogan Ozbahçeçî koxûşî ra vetî û cayêkê bê kamera de îşkenceyê înan kerd.”
Emanî pare kerd ke tepişteyan raporê derbkerdişî girewt û dima tepişteyî erşawîyayî koxûşêkê bînî. Emanî eşkera kerd ke înan grevê vêşanîye dayo destpêkerdene û eke îşkence nêqedo grevê vêşanîye bikerê grevê vêşanîye yê bêdemî.
Emanî venga Baroyê Amedî, OHD û Komeleya Heqanê Merdiman da ke wa vera nê kerdişan têbigêrê.
