Zîndanê Afyonî de vera tepişteyanê kurdan teda û îşkenceyî zêdîyenê. Tepişteyî 3ê çeleyî ra nata grevê vêşanîye kenê.

Tepişte Harun Paçalî keyeyê xo de pêvînayîş kerd û înan rê qala îşkenceyî kerde. Goreyê keyeyê Paçalî îdareyê zîndanî tedaya tepişteyan keno û her roje gardîyanî erzenê koxûşan ser. Dîya zanayene ke îdareyê zîndanî binê nameyê ‘îçtîma’ de tepişteyan rê îşkence keno, hacetanê tepişteyan têmîyan keno, dest nano kitab, çay û bîskuvîyanê tepişteyan ser.

Harun Paçalî dîyar kerd ke wextê sereştişan de tepişteyî yenê berdene bi cayêkê 2 metreyan o. Keyeyê Paçalî ard ziwan ke wextê pêvînayîşî bi hawayêkê keyfî vurîyenê, heqê qiseykerdişê bi telefonî yeno astengkerdene û wextê agêrayîşê pêvînayîşî de tepişteyan rê heqaretî yenê kerdene.

Vera teda û îşkenceyî 6 tepişteyî 3ê çeleyî ra nata grevê vêşanîye de yê. Goreyê agahîyan Habîl Emen, Yûsûf Bîrkan, Yûsûf Erkek, Mehmet Emîn Dal, Sîraç Keskîn û Cûmalî Yildirim grevê vêşanîye de yê.