Aktîvîstanê Behdînanî ard ziwan ke zîndananê PDKyî de îşkence û muameleyê xirabî est ê û wina vat: “Her çiqas ma mîyanê çar dêsan de bibê zî fikrê ma nêno hepskerdene.”

Ebasî pare kerd ke ê sey rojnamegerî, çalakîker û mamostayî ameyî remnayene û serrêke zîndan de mendê. Ebasî vat: “Hema tayê embazê ma zîndan de yê. Zîndananê PDKyî de îşkenceyê fîzîkî û psîkolojîkî zaf ê. Zîndananê PDKyî de hûrmetê heqanê merdiman çin o. Destûr nêdîyayêne ke ma keyeyanê xo de zî qisey bikerdêne. Seke ma dişmenê înan bîyê ma rê muamele kerdêne. Hucreyê PDKyî zaf teng bîyê ke ney zî psîkolojî rê bi xirabî tesîr kerdêne. Ez tim embazanê xo yê tepişteyan rê vana ke ‘xoverdayîşê şima hêz dano ma.’ Xoverdayîşê înan ra şar zî wurzeno we û PDKyî rê nêrazîbîyayîşê xo mojneno.

Hukmatê Herêma Kurdistanî û PDK Behdînanî sey mulkê xo hesibnenê û nêwazenê heqanê şarî bidê. Behdînan de çew nêeşkeno qalê heqanê xo bikero.”

Bendewar Eyûbî vat: “Ez 2020 de ameya remnayene û dima bi bêhuqûqîye tepişîyaya. Seba ke ez tewra çalakîyan bîya zîndan de menda. Seba ke ma waşt ke maeşê mamostayan bizêdîyo PDKyî ma rê wina kerd. Dihok de heqî yenê astengkerdene. Hetêkî ra bombardumanê Tirkîya hetê bînî ra wêrankerdişê dewan û şehadetê şaran. Asayîşê Dihokî yê PDKyî wexto ke çew vera nînan vengê xo vejo erzeno keyeyanê înan ser.

Ma zîndan de nêeşkayêne ke rabikerê. Hucreyê ma qij û teng bîyî. Rixmê hende zulmî zî ma teslîmê înan nêbîyî. Her çiqas ma mîyanê çar dêsan de bibê zî fikrê ma nêno hepskerdene. Çunke fikrê ma azad o. Waştişê ma yê çalakîkeranê Behdînanî o yo ke cade embazê ma yê tepişteyî wa vera bidîyê.”