Zext û binpaykerdişê heqê merdiman ê zîndananê bakurê Kurdistan û Tirkîya dewam kenê. Hetêk de zîndanan de tecrîd esto, tepişteyê nêweşî û yê ke cezaya ci qedîyaya nînê veradayîş û hetê bînî de zî di serranê peyînan de zîndanan de hûmara mergê şikinî yê tepişteyan zî zêdîyena. Vera şertanê xiraban ê zîndanan Wezîrê Edaletî Bekîr Bozdagî tewr peynî îdîa kerd ke zîndanan de îşkence çin o. Çi heyfo ke vera hende mergê şikinî yê tepişteyan, binpaykerdişê heqan û îşkenceyan rayaumûmîye de reaksîyonê girdî nêvejî yenê û na rewşe de mergê şikin û muameleyê kêfî zêdîyenê.
Tewr peynî roja 24ê hezîrane de welatîyo bi nameyê Alî Ataçî (20) çarçewa hedîseyêkê edlî de qezaya Avcilarî ya Stenbolî de ame destbendkerdiş. Badê kar û gureyê îfadegirewtişî yê Qereqolê Polîsan yê Fîruzkoyî sewqê Edlîyeya Bakirkoyî ame kerdiş. Ataç tîya ra zî sewqê Mehkemaya Cezaya Silhî ame kerdiş. Mehkema qerarê tepiştişî da û Ataç şirawit Zîndanê Metrîsî. Goreyê îdîayan Ataç bi bahaneya pandemî hucreyê yewkesî de ameyo tepiştiş. Di rojî badê tepiştişî zî bi îdîaya ‘Şewat vet û hewl da xo bikişo’ wedarna Nêweşxaneyê Perwerdeyî û Cigêrayîşî yê Bagcilarî. Vejîya raşte ke Ataç wexto ke ameyo nêweşxane mergê mezgî virazîyayo.
Hende mergê şikinî yê ke nînê hûmaritiş estî, labelê reyna zî kişta selahîyetdaran ra yeno îdîa kerdiş ke îhmal û îşkence çin o.
Mehmet Hanefî Bîlgîno ke tehlîyeya ci rê 5 mengî mendî bî vizêr Zîndanê Bolu de dinyaya xo bedilnaye. Cenazaya Bîlgînî şawîyaye Çewlîgî. Zîndanê Bayburtî de tepişte Muhammed Yildirim (22) bi îdîaya ‘xo kişto’ wedarîyabi nêweşxane û dinyaya xo bedilnayebî. Goreyê îdîayan Yildirimo ke hîrê mengî yo Bayburt de tepişte bi, bi heban xo kişto. Kadîr Aktaro 17 serre bado ke Zîndanê Maltepeye ra di rojan tepîya rayna ame tepiştiş û dima ra bi hawayêko şikin dinyaya xo bedilnaye. Garîbe Gezere Zîndanê Kandira yê Cinîyan de her çend ke bi desan reyan waştişname bida ke gardîyanan tecawuzê aye kerdî reyna zî nêameye goşdarîkerdiş û aye zî bi hawayêke şikinî dinyaya xo bedilnabî. Vedat Erkmenî Zîndanê Tekirdagî yê Tîpa Fyî de, Yilmaz Ekîncîyî Zîndanê Aydinî yê Tîpa Eyî de û Sezer Alan û Sînan Kayayî Zîndanê Îdirî yê Tîpa Syî de dinyaya xo bedilnaye.
Merdimê tepişteyan seba veradayîşê tepişteyanê ke înfazê înan ameyî veşnayîş û yê nêweşî Amed, Wan, Îzmîr û Stenbolî de dest bi çalakîya Nobeta Edaletî kerdbî û na çalakîye hema zî dewam kena. Merdim û pawitoxê heqê merdiman verê zîndanan de seba caardişê edaletî her roje xover danî.
