Komelaya Şêx Seîdî ya ke merkezê xo Amed de ro seba yadkerdişê Şêx Seîdî waşt ke Salona Sezayî Karakoçî de yew panel virazê la Valîyê Amedî no panel qedexe kerd û sebeb zî “yewbîyîşê komele xirabe kerdiş” nîşan da.

Seba qedexe kerdişê panelî û qeyûm tayînkerdişê Wanî ser tornê Şêx Seîdî û serekê Komeleya Sêx Seîdî Kasim Firatî rojnameyê marê qisey kerd û vîna vat: “Nê se serrî yo ke zilm û zordarîya dewlete kurdan ser o dewam kena. Serra 1925 serewedertişê Şêx Saîdî virazîya. Verê serewedertişî yew prowakasîyon despê kerd û badî zî dewleta tirke vera şarê kurdan politikaya îmha û înkarî rast kerde. Meclîsê Enqarayî de yew Qanûno bingeyî viraşt û nî qanûnî de heme heq û hûquqê kurdan ameyî înkar kerdene.”

 Komployê Mîyanênetewî domîyeno

Kasim Firatî serê zîhnîyetê sîyasetê devleta tirke vinert û nîya va: “Zîhnîyetê tirkan nêbedilîyayo, pergalê xo eynî dewam keno. Têgêrayîşê Azadîya kurd vera politikaya îmha, înkarî û qirkerdişî irf û adetê têkoşîna xo dewam kenê. Yew heti ra zî komployê Mîyanênnetewî domnenê. Yew cografyaya kurdan esta û çar leteyê kurdistanî esto û kurd yew şarêko qedîm o. Na cografya de deshilatîya tirkan ra çend împaratorî ameyî vîyartî ra. Cengîzhan, Osmanî, Ataturk. Pêyro zî vera şarê kurdan ra zilm, zordarî û şimşêrê xo rey de heme miletî qetil kerdî. Ewro zî eynî zîhnîyet domîyeno. Eynî roje şaraderîya Wanî rê qeyûm eştiş tesadufî nîyo. Roja vîrîardiş û yadkerdişê Sêx Seîdî û 15ê sibatî 1999 de seregêrra komployê Mîyanênetewî bi û eynî roj eştişê qeyûme yew peyam o û hema zî komplo dewam keno. Vera kurdan yew tehamulê dewlete çinîyo. Qedexe kerdişê panelê Şêx Seîdî zî yew siqandal o girdo.”

Rojawa sembolê çar leteyanê kurdîstanî yo

Rojevê newî ser o zî Kasim Firatî qesî kerd û nîya vat: “Yew hetira rojawanî de qirkerdiş esto, nê qirkerdişî de însanê sîvîlî, rojnamegerî û hunermendî qetil benê. Heto bîn ra zî vanê pêameyîş û aştî. Dirîtîya nîyanêne nêbena. No tewr politikaya xapênayîşîya. Rojawa sembolê çar leteyanê kurdîstanî yo û ganî heme çar leteyê kurdîstanî Pîya paştî bide û bipawê. Dinîya pêro Rojawayî şinasnena û hûquqê kurdan qebul kena. No sebeb ra zî Emerîqa, Îsraîl, Îngîltere û Ewropa ganî Rojawa de rolê garantorîye kay bikerê. Ganî kurdî zî xo mîyanî de yewbîyîşê xo virazê, heyana kurd yewbîyîşê xo nêvirazo se, sernêkewno.”

Kasim Firatî qeseyê xo nîya qedênayî: “Ganî kurdî politikaya teslîmîyetî qebul nêkerê û daîma xoverdayîşê xo berz bikerê. Wesîyetê Şêx Seîdî esto, Şêx Seîd vano ganî tornê mi û şarê ma vera qirkerdişê politikayanê tirkan doza kurdan bidê dewam kerdene. Daîma xoverdayîşê xo berz bikerê û sereyê xo berz bigêrê. Çok nêronê, sereyê xo çewt nêkerê. Roje roja xoverdayîşî û rûmetî ya.”