Li ser medyaya dijîtal dîmenek hate parvekirin ku komek di nava taxên Helebê de digere û bi hoparlorê bang li jinan dikin ku hîcabê li xwe bikin. Gelek beşên Sûriyeyê û jin jî li hember vê dîmenê bi fikar bûn. Li taxên Ezîziye û Silêmaniyê ku piraniya niştecihên wan xiristiyan in, komekê bi hoparlorê bangên “Hîcab hîcab ey ummeta xwedê” “Allahuekber” bang dikin. Li Hemayê jî, komeke bi navê “Banga xêrê dikin” pirtûk û broşûr li bajar belav kirin. Di wan de hatiye nivisîn “Yê xeberan bi xwedê dike divê were kuştin”. Komeke din a ji 25 jinan jî a nave “Însiyatîfa Belavkirina Hîcabê” li xwe kiriye, li Hemayê 100 cil û bergên îslamî belav kirin. Der barê guhertina materyalan de jî hikumeta demkî ya Sûriyeyê ji refa yekemîn heta 12an gelek guhertin çêkirin. Babeta ‘Wataniye’ ji materyalan bi giştî rakirin û di babeta perwerdeya îslamiye de jî guhertin çêkirin. Dîsa navê ‘Zenobiya’ ku ji bo sûriyeyiyan semboleke dîrokî ye û rola pêşeng a jinan di dîrokê de rave dike, ji pirtûkan hate rakirin.

Têkildarî geşedanên dawî yên li diji jinan, Kombûna Jinan a Zenobiya daxuyanî da. Kombûna Jinan a Zenobiya bertek nîşanî bernameya nû ya perwerdeyê ku ji aliyê hikûmeta demkî ya Sûriyeyê ve hat danîn da û got: “Em bang li rayedarên eleqedar dikin ku bi lez van guhertinan sererast bikin”

Kombûna Jinan a Zenobiya di daxuyaniyê de wiha hat gotin: “Em bertekek tund li dijî guhertinên dawî yên di bernameya perwerdeyê de ji hêla wezîrê nû yê perwerdeyê ve di hikumeta demkî ya Sûriyeyê de, raber dikin. Ev yek çand û dîroka me tune dike û rola jinan di avakirina şaristaniyan de diçewisîne. Di vê guhertinê de rol û navê jinên pêşeng ên Sûriyeyê di nav de Melîka Zenûbiya ku sembola îsrar û berxwedanê bû, tê rakirin. Ev ne tenê jibîrkirina hinek navan e, jibîrkirin û windakirina dîroka Sûriyeyê ye.”

Kombûna Jinan a Zenobiya di dawiya daxuyaniyê de bang li hemû rewşenbîr, rojnamevan û kesên zana kir ku li dijî van guhertinan bêdeng nemînin û li hemberî tunekirina nasname û mîrasa xwe xwedî sekn bin û wiha bi dawî kir: “Em di wê baweriyê de ne ku bi hev re û bi destekî em ê li hemberî êrişên tunekirinê yên li ser çand û mîrasa civaka xwe bisekinin. Em ê parastina hebûna xwe bikin û pêşerojek baş ava bikin. Em piştevaniya hemû jinên ku ji bo azadî û mafên xwe têdikoşin, dikin. Em dengê xwe li hemberî zordariyê bilind dikin û ji bo avakirina pêşerojeke ronî dixebitin.”