Endama Konseya Hemserekî ya PYDyî Foza Yûsife derheqê serrgêra Şorişê Rojawanî de fikr beyan kerd u vat: “Şorişê Rojawanî yê 19ê Temmuze seba şarê herême sîstemêko newe û cuyêka neweye awan kerdî.”
Endama Konseya Hemserekîye ya PYDyî Foza Yûsife bi wesîleya serrgêra Şorişê Rojawanî ANFyî rê qisey kerd û gefê îşxalî yê dewleta tirke ercnayî.
Foza Yûsife ard ziwan ke 11 serrê şorişî seba şaranê Rojawanî hetê hetî ra bîyê mîladêk û vat: ”Rojawan de wisarê şaran bi Şorişê 19ê Temmuze qewimîya. Hêzê antîdemokratîk û serdestî seba ke şorişî ra aciz ê dişmenê ci yê. Projeyê Rojawanî projeyo tewr xurt ê demokratîkbîyayîşî yo. Hêzê faşîstî, nîjadperest û dişmenî coka nê projeyî xo rê sey gefî vînenê. Destpêkî ra nata vera Şorişê Rojawanî hêrişî estê û şarî vera nê hêrişan xo ver danê. Ma heta nika zaf zehmetî dîye la esasanê Îdareyê Xoserî û Neteweya Demokratîke ser de dewam kenê. Seba mendekerdişê sîstemî û destkewteyan têkoşînêko pîl yeno kerdene.”
Foza Yûsife da zanayene ke vera Şorişê Rojawanî tim gefî est bîyî û înan seba pawitişê şorişî bedelê giranî dayî. Foza vat: ”Şorişê Rojawanî yê 19ê Temmuze seba şarê herême sîstemêko newe, cuyêka neweye awan kerdî. No sîstem seba şaran bî hemleyêke û hêvîyêke. Ewro serkêşîya dewleta tirke de gefê hêrişî yenê wendene. Xora dewleta tirke her roje hêrişê herême kena. Şaranê herême her wextî ra zêdeyêr fam kerdo ke Îdareyê Xoserî ra ber rayîrêkê çareserîye çin o. Rayîrê bînî kaos û nearamî yê.
Yûsife qiseykerdişê xo rê wina dewam kerd: “Heta nika teberê Sûrîye de, bê Sûrîye pêkerdişî, peymanî û kombîyayîşî ameyî kerdene û şaranê Sûrîye nê red kerdî. Çareserîya krîzanê Sûrîye teber de nîya. Mesele mîyanê Sûrîye de ya, çareserîye zî ganî Sûrîye de bêra afernayene. Ne Cenevre ne zî Astana seba Rojawanî nêbîyî çareserîye. Nînan de menfaetê ê dewletan ameyî esaskerdene. Eke ewro Sûrîye de krîz dewam keno sebebê ci nê kombîyayîş ê.”
