Dişmen ebê se serrî yo to qir keno

Semedê çînbîyayena to ser o

Ti yew nêbîya şarê xo ra pîya

Ge faris, ge ereb, ge-ge tirk pêskarê cuya xo kerd

Ne kokimê to, ne gencê to, cenî û qicê to, ne jîyar û darê to verdayî rîyê ardî de

Her ke to cê ra birna, to goşê xo kerdî ker vengî bîrayê xo rê.

Rojhelato Mîyanên newe ra dîzayn beno, dezgeyî winî musnenê ke, no dîzayn bê kurd nêbeno. Çunkê êyê ke dinya dîzayn kenê vînenê, ne erebo de ne fariso de ne kî Tirkîya de sîyaseto stabîl çîn o. Nê dewletan destê xo do bi teror, yew qilêr ra vecînê ginenê zerrê zobîna qilêrî. Tirkîya û Îran pêro hêzê xo û peranê xo kurdo werte ra wedarnayîşî ser o xerc kenê. Labelê çiqaş ke xo pirtnenê, hunde ginenê binê çalê. Îran xo ra zerrê kayî de çîn bî, la nê kayê neweyî de winî vînenîme ke Tîrkîya kî çîn bena.

Vera kurdan sempatî

Dewleta tirke, destê Bahçelî ra newe ra yew aştîya zure arde ziwan. Wertê de qe teba çîn bî, Bahçelî şî desinde destê xo da wekîlanê kurdan. Ma va se beno… kotî de verg veşan merdo ke no nîya keno… qalê aştî û birayîne kenê, dima ra qolê erzenê ra serê kurdan. Nê de çîyode xirab est o. Operasyonî unitî şarê ma, sîyasetmedarê ma kerdî zîndanan. Şaredarê ke îradeyê şarî ra amê weçînitiş qayûmî eştî ser. Nê perê mavênê weçînitişê Hemilka û alojîya Rojhelatê Mîyanênî de kerdî. Çunkê î fikîrînê ke zerrê na alojîye de çiqaş kurdan ra çîyê biqurfnîme hande rind o. Çira nîya kenê… çunkê î tayê çîyê ke ma nêzanîme zanenê. Zanenê ke dinya de kurdo rê sempatî bîyo zêde û dûştê terorîzmî de findenê, no kî zerrê îno re weş nîyeno. Zulm û zordestîya xo kurdî ser o kenê zêde ke kurdî kaşê terorî bîkerê û sîyasetê legalî ra dûrî bîkerê. Çîyo ke hetê leşkerî ra nêeşkenê bikerê, dek û dubaro ra wazenê bikerê. Labelê bawerîya kesî înan rê nêmenda.

Wa kurdî yew bibê!

Erdoganî zaf keyf kerd ke Trump reyîna bî serokê Hemilka, la hal winî musneno ke keyfê Erdoganî baqurika î de maneno. Wezaretê Trumpî de tayê dostê kurdan est ê, no kî hewnê Erdoganî remneno.

Têdima eşkerakerdişê wezîrê karanê teberî yê Îsraîlî hete kurdo ra bî. Kurdî dinya ser de benê wayîrê qeseyî la çîyo verên û pêro ra muhîm, zarurî yo ke zerrê xo de yew bibê, eke yew nêbenê wusarî vînenê, amnanî nêvînenê. Nêweşîya verêne ra xo raxelesnîme. Rastîye a wa, kam ke qomê to wazeno dinya ser o biciwîyo kişta ey/aye de bimane. Dinya ser o hemkaranê xo zêde bike. Kes semedê rindîya to û humanîzmê to haqa to nêvînenê.