Parlamenterê HDPyî Necdet Îpekyuzî bale ante yewbîyayîşê hezanê demokratîkan û wina vat: “Roje a roj a ke ma mil bi milî bidê. Dest bidê destî. Yewbîyayîş panzehîrê dişmenîye yo.”

Îpekyuzî pare kerd ke hûmara beşdaranê mîtîngî îsbat kena ke Îtîfaqê Kede û Azadîye weçînayîşan de do ser bikewo. Îpekyuzî îfade kerd ke rixmê teda û astengîyan zî coşê girseyî mojna ke ameyox hetê kede û azadîye de yo. Îpekyuzî cewab da îdîaya ‘Eke HDP bi namzetê/a xo şoro weçînayîşî, no do faydeyê Îtîfaqê Cumhurî bikero’ û vat: “Ganî masaya 6 partîyan hêverî cewab bida ke çira înan heta nika ma de têkilîye nêviraşte û heta nika ziwanêko tûj şuxilnayo. Tirkîya de weçînayîş bi giranî çarçewa di îtîfaqan de yeno nîqaşkerdene û wird îtîfaqî zî perspektîfê vurnayîşî nêdanê. Ma bi alternatîfêkê winayênî yenê ke do meseleyanê Tirkîya çareser bikerê, seba komarêka demokratîke game bierzê. Nê rayîrî de ma bedelê giranî dayî. Tewr peyên Mehkemeya Qanûnê Bingeyî hetkarîya xezîna bloke kerde û partîya ma pê qefilnayîşî yena tehdîtkerdene. La rixmê nê kerdişan zî partîya ma vera bena pîlêr. Mîtîngê Kartalî de hûmara beşdaran mojna ke ma hê rayîrê raştî ser de yê.”

Îpekyuzî seba ê kesanê ke binê tesîrê spekulasyonan de manenê vat: “Nika wextê ci ameyo ke ma paştî bidê yewbînan, pare bikerê. Îqtîdar heta nika dişmenîye geş keno. Ma mabênê wird tercîhan de mendê, ma bi tercîhê xo kêfweş û xurt bibê. Roje a roj a ke ma mil bi milî bidê. Dest bidê destî. Yewbîyayîş panzehîrê dişmenîye yo.”