Erdê Kurdîstanî bi hezaran serrano binê bandora dewletanê serdestan de yo. Kamîye, kultur ve ziwanê kurdan raştê her tewr zext û tedayan ameyî. Estîya şarê kurdî raştê her tewr tehlukeyî ameye. La kurdan cuya kolekîye qebûl nêkerde û vera zordestîye têkoşînêko bêhempa kerd. Seke zanîyeno fîlozofo frîgyayij Epîktetos verê cû “bende” bî û dima ra resa azadîya xo. O qîymetê azadîye her kesî ra zêdeyêr zano û wina vano “keso ke efendîyê xo nîyo, nêeşkeno azad bibo.” Kurdan zî seba ke efendîyê xo bibê, xover da û verê serdestan vileyê xo çewt nêkerd.
Xoverdayîşê kurdan de bêguman cayê PKK’yî cîya yo. PKK têna têgêrayîş nîyo, eynî dem îdeolojîyo ke kurdan, pelixîyayoxan û bindestan xelisneno yo. Senî ke roj dinya roştî keno, PKK zî raya şaran û kamîyanê pelixîyayeyan roştî keno. Sayeyê ey şarê kurdî hem xo rêxistin kerd, hem xo bedilna, hem ravurîyayîşo komelkî viraşt hem zî hemverê serdestan û kolonîzatoran xoverdayîşêko bêemsal kerd. Coka merdim eşkeno vajo ke serra 1978 tarîxê şarê kurdî de serra “gandarbîyayîşî” ya.
Xoverdayîşê Mazlum Doganî
Sere de Rayberê Şarê Kurdî Abdullah Ocalan heme şorişgeran armanc kerd ke şarê kurdî azad bikerê. Seba nê armancî bedelê pîlî dayî. Mîsal Mazlum Doganî zîndanê Amedî de leşa xo vêşnaye. Seba ke erdê Kurdîstanî “kolonî” nêbo, seba ke şaro kurd “bende” nêbo, seba ke kamîye û kulturê kurdan teslîmê asîmîlasyonî nêbo, ey cuya xo ra fek vera da. Ey verê zulmkarî de zanîyê xo nêronayî. Ey hertim wina vatêne: “Armancê ma yo tewr tay xoserî ya”. Ey giranîye dayêne xoserîya şarê kurdî. Ey zanêne ke zulmkarî na cografya de seba çinkerdişê şarê kurdî xeylêk metodî şuxilnayî. O herêma Dêrsimî ra bî. Ey zanêne ke na herême de qirkerdişo gonîn qewimîya û bi hezaran kirmancî bi hovî ameyî qirkerdene. Ey rêça Seyît Rizayî taqîp kerde û mêrasê têkoşînê ey aver berd.
Têkoşînê Kemal Pîrî
Şorişgeranê ke seba xelasa pêro şaranê bindestan têkoşîn kerd ra yew zî Kemal Pîr bî. O Gumuşxane ra bî û ciwanîya xo de dîsîplînê sosyalîzmî qebûl kerd. Ey zanêne ke têna sosyalîzm eşkeno şaran bixelesno. Ey fikrîyêne ke ganî heme karkerê Tirkîya û Kurdîstanî peştî bidê yewbînî û vera sinifanê serdestan têkoşînê hemparî bikerê. Ey dî ke PKK fikrê ey temsîl keno. Coka tewrê xoverdayîşî bî. Ey bawer kerdêne ke rojêke Tirkîya û Kurdîstan de heme şar û îtîqatî do bixelesîyê. Seba nê armancî zîndanê Amedî de xover da û serra 1982 de netîceya rojeyê mergî de şî heqîya xo. Ey peyê xo de mêrasê xoverdayîşî yo rûmetdar verada. Ewro domanê Kurdîstanî wayîrê nê mêrasî vejînê û raya sosyalîzmî ra şinê. Ewro yan siba têkoşîno sosyalîst do serkewte bibo û heme şarê bindestî do biresê azadîya xo.
