Lêkolîner Omer Guneş û Îbrahîm Şahîn bi navê ‘Dengbêj Huseyno’ pirtûkek derxistin. Pirtûk ji aliyê Weşanxaneya Nûbiharê ve hat çapkirin.
Herdu lêkolîneran beriya ‘Dengbêj Huseyno’ du pirtûkên bi navê ‘Dengbêj Reso’ û ‘Dengbêj Şakiro’ derxistibûn. Niha di vê rêzepirtûka bi navê ‘Antolojiya Dengbêjan’ de pirtûka sêyemîn derxistin. Di herdu pirtûkan de li ser jiyan û klamên wan bi berfirehî sekinîbûn û niha jî li ser Dengbêj Huseyno pirtûk amade kirin.
Guneş û Şahîn li ser xebata xwe wiha dibêjin; “Di vê xebatê de armanca me ew bû ku em ji bo her cure xebat û lêkolînên ku di pêşerojê de li ser dengbêjiyê bên kirin, bingeheke têr û tijî amede bikin. Her kesê ku bixwaze lêkolîn li ser dengbêjan û kilamên dengbêjiyê bikin bila li ber destê wan xebateke antolojîk ku ji hemû kilam û danasînên dengbêjan pêk tê, hebe. Em bi vê mebestê ketin rê.”
Di vê çarçoveyê de wan di nava 20 salan de nêzî 400 kasetên dengbêjan dane hev. Piştî vê jî wan dest bi deşîfrekirina kaset û sazkirina pirtûkan kiriye û niha pirtûka sêyemîn li ber destên xwendevan û hezkiriyên dengbêjan e.
Guneş û Şahîn di van xebatan de pirtûk li ser 5 bingehan sazkirine; ‘Kilamên Serhildanê’, ‘Kilamên Evîniyê’, ‘Klamên li ser şer û pevçûnên navxweyî-eşîrî’, ‘Kilamên li ser xwezayê, ramanê, jiyanê’ û ‘Destan’. Ji bo vê pirtûka dawî jî dibêjin ku “Ji ber ku di nav kilamên Dengbêj Huseyno de destan tuneye, ev beş wek kategoriyek di naveroka wê cildê de cih nagire.”
