Babîyê Ayfer Bîlgîne Şêx Abdulhamît 13-14 serranê xo de tewrê xoverdayîşê Şêx Seîdî bî. Ey bi Şêx Şerîfî pîya têkoşîn kerd.

Ayfer Bîlgîne ANFyî rê qala xoverdayîşê keyeyê xo kerde.

Ayfer Bîlgîne wina vat: “Babîyê mi Şêx Abdulhamît 16 serrî Surîye de surgun bî, dima agêra Kelaxsî. Babîyê mi ge ge bermayêne. Şêx Şerîf amebî dardekerdene, Şêx Huseyîn zîndan de şehîd bîbî. Ey ê derd kerdêne. Herême de giranîya babîyê mi est bîye, her kesî goş dayêne ey ser. Babîyê mi şuxilnayîşê çekan û wendiş musnayêne ma.

Birayê mi Lezgîn domanêko jîr bî. Her kesî Lezgînî ra zaf hes kerdêne. Dima ke Siddik Bîlgîn ame kiştene, keyeyê ma vila bî. Lezgîn hînî her çîyê ma bî. Lezgîn şî leşkerîye ame la dişmenî rayîrêko bîn nêda ci. Peynî de ey çewlikê xo rot, heywanê xo rotî û şî koyan.

Rodî zî domanêko jîr û zerrîwaz bî. O lîse de ame tepiştene û berdene bi Amedî. O çax ez Dara Hêni de roniştêne. La tedayan ra ma keyeyê xo berd Xarpêt. Şewêke dadîya mi vat ke polîsan reyna Rodî berdo. O çax Rodî Xarpêt de Ozgur Gundem de xebitîyayêne. Ey Meletî de Murat Bozlakî de roportaj kerd. Agêrayîşê Meletî de o ameyo tepiştene.”