Omid
Ez to ra gêrana
Mi xo vera dayo mîyanê tersanê tarîyan
Yew nimiteyî de hurdî-hurdî gîrîna
Xirxilîyayîşê merdiman de ez yew têla bêzar a
Mîyanê rêzan de ez yew çekuya guna ya
Boya yabanî êna elbet huyayîşê mi ra
Û bermê mi de kilî kenê deryayê dûrî.
***
Bê mi bêrê hevala min a nêzaniteye
Dest bide mi, ez yew hîrayîye de gina war o
Ez vînena, hîna o pîzez o pîzê ma de leqeno
Ez hesnena hîna o birr o venga ma dano
Ti waya min a, ti hevala mi, waştîya zerreweşîya mi
Hesîranê mi bure, serxoşîya to wa bireso asmênê hewtinan
Mi rê manike têke deyîranê ziwanê ma yê kalî ra
Ke roja ma bireso, rayîro dûr sey yew pitî rîyê ma de bihuyo.
***
Ez zanena
Gonîya to resaye lîlîka erdî ê wextê Homayan de
Vengê estanika to birîyayo nika nê dewrê merdiman de
Her çiqas ez hêsîr bî zî nuşteyanê jenginan de
No helmê to yo nayo mi de kelîno, pijiqîno.
***
Hey derd û kula mi, adirê ganê mi
Hey şewa çeleyî ya ke boya wisarî ci ra darîyena we
No tarîyê kitaban êdî bes o
Rindekîya destê to mi rê hende ke cayê ra bîyaso.
Ziwanê Maya Mi
A cînika çimkeske tarî ra taşena rîyê xo
Tarî ra gêrêne beçikê xo bisebir, giran-giran
Û doz kena game bi game gilanganê xo
Destê xo tarî de gilangê xo astaran de
Vengê serran zimrit ra yo
Xuşano ganê mazêre de.
***
Serê ziwanê ci de tahmê gilanganê mazêre
No hewnê bi o, remeno qulanê lulîye ra
Zinaran ra gêreno, tîkîla koyan ra nîyadano ke
Yew hewro pak êno ra şitê xo de
Wexto ke kuna ra virana mazêre de.
***
Serê zerrîya koyî de yew lawike nimite ya
Rengê xo sûr, lewê xo kewe, destê xo destê mazêre de
Helmê demê merdeyî tey lûq dano sey şayê maran
Kelê ci sey deryayî tev dîno, çilqino
Sey şitê bize sipe-sipe gîrîno
Vengê xo vengê vayî de.
***
Şiwaneyê bize, birayê mazêre, verfekê koyî,
O kaleko erdîşsipe na lawike vano, bêveng
Wexto ke çekuyê xo yew kîşînê serê zerrîya koyî de
Destê xo girêdaye, ziwanê xo kîlîtkerde
Meyîtê xo sey hewrê gilê koyî, gilanganê mazêre ra dardekerde
Zanê, erd şayîdo kan o, meyîtê ey ra yew cewab vejeno
Sey yew kitabê kanî veşnenê, vay danê wele
Û wela ey nika, newe ra û newe ra
Gilanganê mazêre de, şitê bize de, serê zerrîya koyî de.
Çime: Deniz Gunduz, Xapxapik, Weşanxaneyê Vateyî, Îstanbul, 2014, rr. 9-12/31-34.
