AKP û Serekê ci Erdogan tim wina îdîa kenê ke wextê îqtîdarê ci de Tirkîya bîya welatê azadîyan. La raporê rêxistinanê heqanê merdiman eqsê ney vanê.

Komeleya Heqanê Merdiman (ÎHD) derheqê îqtîdarê AKPyî yê 22 serrî de doneyî arê dayî û raporêk amade kerd.

Rapor de nê kerdişê AKPyî ameyî rêzkerdene:
Netîceya înfazanê bêhukman ê bi destê polîs, cenderme û pawitoxan de 1229 kesan dinyaya xo bedilnaye, 3 hezar û 147 kesî birîndar bîyî. Zîndanan de nê 22 serran de 916 kesan bi nê hawayî dinyaya xo bedilnaye û 64 kesî birîndar bîyî.

Wextê îqtîdarê AKPyî de 19 hemwelatîyê destbendkerdeyî dîyayî vînîkerdene. Ancî wextê nê îqtîdarî de tewr tay 200 hezar kesî ameyê destbendkerdene, nînan ra 19 hezar 992 kesî raştê îşkenceyî ameyî û 73 hemwelatîyê destbendkerdeyî ameyî qetilkerdene. Wextê îqtîdarî de 80 hezar kesî raştê îşkenceyî ameyî.

Hêrişanê çete û hêzanê dewlete de 22 serran de 647 kesan dinyaya xo bedilnaye û 5 hezar û 415 kesî birîndar bîyî. Hêrişanê faîlanê meçhulan de 442 kesan dinyaya xo bedilnaye û 684 kesî birîndar bîyî.Wextê îqtîdarê AKPyî de bi metodanê cîyayan 579 kesan rê ajanîye ameye ferzkerdene.

Hezar û 322 çalakîyê hunerî yê kurdkî ameyî qedexekerdene. Dest nîya hezar û 165 kitab û kovaran ser. 203 reyî kovar û rojnameyî ameyî qefilnayene. 32 reyî polîsan eşt merkezanê kulturî ser.

Tirkîya de nê 22 serran de vera 8 hezar û 302 çalakîyan hêriş ame kerdene yan zî nê çalakîyî ameyî qedexekerdene. Vera bînayanê partîyanê sîyasîyan 843 reyî operasyon ame kerdene û 527 reyî hêrişê bînayanê partî û komeleyan ame kerdene. Derheqê partî û komeleyan de 907 dewayê qefilnayîşî ameyî akerdene. Vera des hezaran kesan de tehqîqatî ameyî akerdene.

29 hezar û 369 kesî wextê nê îqtîdarî de seba ke tewrê çalakîyan bîyê yan zî fikrê xo ardê ziwan ameyî tepiştene.