Dogan Munzuroglu
Êndî hêf nîyo, her ser o arra ostorê pêrî
Kutik lepî kodê sêminî de buro
Sar cilkê sîyayî berzo ma ser
Êndî bes nîyo, pagan de vasê yabanî birewî yo.
***
Êndî barê ma kut raye, zaf qeşî binge nêcêno
Êndî nanê ma bî lete, rêçê ma bîyî vîndî
Barsê ma bî vila şî, teselîya ma kute
Êndî zor û zerp dîna bakî bimano.
***
Êndî bes o, roştîya dîna rê na hente bes o
No wa ke yena zulmata tenekan a
Êndî herre (welle) çimanê ma kuyo
Vacê “dormê koyê Muziran de camêrdî est bîyî, cenikî est bîyî
Janêdê îno est bîyî, heqî ci rê afernabî
Îno ebe xo neqesnabî
Zor û zerp ama, bî vila, şî”
Vace, “hal mecal nîya nîya”.
***
Wa tifangê camêrdo dare ra bimano
Wa hegayê citkarû sere ra bimano
Wa torzenê ma darî ra bimano
Wa elega ma ardû ra bimano
Wa helanika (çançolika) domanû dare ra bimano
Wa dirbetya ma mumî ra bimano
Wa nan û sola ma herd ra bimano
Wa nafa henî bo
Êndî zor û zerp, desa desîsa kamî der a
Wa hukmat îna bê
Wa heq îna bê
Wa neheq ma bîme.
***
Êndî daro pê sanê, kardîyo tuz kerê
Lawo, hebino, reseno girê kerê, goçû deng kerê
Êndî kam ke bêveng o, kam ke bê peştî yo qir kerê
Camêrdîye ma ra raver şîye, ma kî dim ra şîme.
***
Êndî bê, min û to destê xo bancîme tertelê dîna ra
Jan hawo şî, şîme dime ra
Nan û sole darîye we, kalê dewreşî şî
Urce ma kî şîme
Waxtê bêbextî yo, kes gos keşî nênano
Kes keşî nêhesneno
Herd êndî vesneno, azê ma de îtîbar nêmendo
Jan nêmend, cîran nêmend, meyman nêmend
Deman nêmend, mobet nêmend
Bowa ma ra kes nêmend
Xirxilê ma ra kes nêmend
Gunê ma ra kes nêmend
Embazanê ma ra kes nêmend
Urce şîme, no wo ke yeno sanê mixenetan o
Urce şîme, hende ke nîno ma teber nêkerdîme.
***
Bê min û to destê xo bancîme hengemê dîna ra
Çîyê yabanî rema şî
Jar û dîyarî remayî şîyî
Cind û pêrî remayî şîyî
Mar û milowin bîle remayî şîyî.
***
Bê min û to destê xo bancîme hengemê dîna ra
Kemer kuç bas nêkeno nê azê peyênî de
Hey wax hey ke camêrdîye qedîye
Hayleme wo, tertele wo, ulidit o, kes keşî nêhesneno
Payîz ê mordeman o
Qitlixîya îsanî ya.
***
Urce, min û to rêçanê xo bancîme haylemê dîna ra
Jan şî, dem şî, fam şî, qedir qîmet şî
Lerze bikîme
Urce ci reşîme.
***
Êndî bê
Adir kile kîme
Mobet xelê kîme
Dem û dewranê dîna
Qiyer û qemê dîna vila kîme
Êndî bê.
Çime: Dogan Munzuroglu, Koyî Bîyê Xezal, Weşanxaneyê Dara, Stenbol, 2023, rr. 35-38.
