Weçînayîşê îdareyê herêmî qabê şarê kurdî ra zaf muhîm ê. Seba ke şaro kurd îradeyê xo beyan bikero û xo îdare bikero muhîm ê. Heyana ewro zî des serrî vêşî yo ke nê îdareyê herêmî destê kurdan dê. La gelo kurdan îdarekerdişê îradeyê herêmî de nê awantajî çiqas gurênayî? Eke no gurênayîşê îdareyê herêmî bêro nîqaşkerdiş zî xoser yew pirsgirêko gird o. Nê warî de nêweşîya îqtîdarî, berjewendî û menfaet rewşa zafî ra ameyî şixulnayîş. Nê warî de ray ray merdim gama ke bifikirîyo, vano ke verekîna ma nê îdareyê herêmî nêgirotêne xo dest û nêgurênayêne. O wext zî no hewa yew nêweşîya îqtîdarî peyda nêbîyêne. No hewa rewşe zî yew ceribnayîşo gird o. La çi heyf o ke hema zî na nêweşîya îqtîdarî dewam kena. Şaro kurd hînê no tewr nêweşî ra eciz bîyo û wazeno ke hînê no tewr nêweşî ra bixelîsîyo. La senî hewa na nêweşî ra bixelîsîyo, o zî pirsgirêko gird o. Nê warî de ganî şorişê zîhnîyetî bibo. Bedilnayîşê zîhnîyetî zî yew dejayîşo pîl o. La no tewr zîhnîyet heyana key domîyeno?
Her rewşa weçînayîşî de wexto ke şonê keyeyan de şarî zîyaret kenê, şarî ra soz danê vanê ma qet eynî xeta û şaşîye nêkenê. La wexto ke weçînayîş qedîyeno eynî şaşîye dewam kena. Weçînayîşanê îdareyê herêmî de tewr muhîm pirsgirêk zî sazîyan mîyan de komê taybetî est î û nê komî zî merdimanê xo vijînenê û goreyê rewşa ahbap-çawişî têgêrayîş kenê. Ganî hînê no tewr zîhnîyeto kor wedarîyo. Hînê ewro ra pey şaro kurd qet no tewr şaşîyan qebûl nêkeno. Eke no tewr şaşîyî bibê, şar nê weçînayîşî de nêşono sindoqan ser û raya xo nêgurêneno.
Xebatkarê şaredarî û qayûmî
Nê warî de zaf kombîyayîş û konferansî virazîyayî. Netîceya nê konferans û kombîyayîşan de eynî rexneyî ameyî vatiş. Vatiş têna nêbeno, la gerek rewşa pratîkî de encam bigêrîyo. Na zî rewşa qiseykerdişî de çekî nêbena. Heyana ewro îdareyê herêmî ra di reyî qayûmî ameyî eştiş û seba eştişê qayûman ra şarî zaf tepkî nênawit. Qayûmo verên 2015 de ame eştiş û nê eştişê qayûmî ra verên ra îdarekar û xebatkarê şaredarî zafî ra bêveng mendî û heta zî qayûman reyde şixulîyayî.
Şarî tepkî nênawit
Qayûmo dîyên zî 2019 ame eştiş. Ena reyna zî şarî ancî zî zafî ra tepkîyê xo nênavit û wayîrê îradeyê xo nêvejîya. No tewr pirsgirêkê gird î. Ganî sazî û dezgeyê kurdan nebzê şarî ra fam bikerê û reyna eynî şaşîyan nêkerê. Hetê bînî ra zî qayûman îradeyê şarî xesp kerd û heme tewr rewşa qirêjîya xo domnenê. Heme sazîyanê şaredarîyan xesp û talan kenê. Wexto ke şaredarî destê partîya şarî de bîyî, zaf rayan ra teftîşê Mehkemeya Muhasebatî virazîyayî, la nê warî de qet yew çîyo bêqanûnî nêdî. Ancî zî qayûm eşt serê îradeyê şarî ra.
Polîtîqaya qirêje domîyena. Faşîzma AKP û MHP polîtîqaya xo ya qirêje şarî mîyan de gurênenê. Nê warî de kenê ke şarî eciz bikerê ke şar nêşoro weçînayîşanê îdareyê herêmî û raya xo nêşixulno. Tebîî na polîtîqaya qirêje ya qayûmî encam nêgêna. Nê warî de şar do vera faşîzma AKP û MHPyî ra zafî ra cewabê xo bido û hewayê her wextî îradeyê xo beyan bikero.
