23yê hezîrana 2020î de dewleta tirke bi akerdişê raşteyê hewayî û bi destûrê Rûsya pê teyareyanê bêmerdimî hêrişê Endamê Koordînasyonê Kongreya Starî yê Herêma Firatî Zehra Berkel, Endama Kongreya Starî ya Herêma Firatî Hebûn Mele Xelîl û Emîne Weysîye kerd. Hîrê cinîyê têkoşerî netîceya hêrişê Tirkîya de ameyî qetilkerdiş.
Dewleta tirke tewr peynî kombîyayîşê Astana ra ver 20ê hezîrana 2023yî de nêzdîyê dewa Til Şeîrê ya Tirbêsipî de bi droneyê çekdarî wesayîtêk dabî bombayan ver. Hêriş de Hemsereka Kantonê Qamişloyî Yusra Derwêşe, Hetkara ci Leyman Şiwêşe û ramitoxê wesayîtî Firat Tuma şehîd bîyî. Hemserekê Kantonê Qamişloyî Gabî Şemon wesayît ra sey birîndar xelisîya.
Hêrişan ra xora ameyo tesdîqkerdene ke dewleta tirke têna sînoranê xo de nê hêrişê çar parçeyanê Kurdistanî û kurdanê Ewropa zî kena. Kam ca de kurdêk bibo, girîyeno hedefê dewleta tirke û taybet zî nê hêrişan de cinî û domanî parêka zêde herînenî. Wazenê ke şexsê rayber û serkêşanê kurdan de şarê kurdî çinî bikerê û werte ra wedarnî. Îqtîdar wexto ke nê caardişanê lêyminan keno, kurdanê xayînan, dewletanê herêmanê ke dişmenîya kurdan kenê û hêzanê hegemonan ra zî paştî gêno. Bi paştîdayîşê hukmatê Iraq, Sûrîye, Îran û hêzanê hegemonîkan vera başûr, rojhelat û rojawanê Kurdistanî hêriş zêdîya. Pê destûrê nê dewletan herra înan ser de kurdî yenê qetilkerdene.
Caardişan ra asîyeno ke nê dewletan babeta kurdan de pêkerd û serê kurdan de qerarê lêyminî dayî. Her dewlete eşkena hêrişê herra dewleta bîne bikera. Qetilkerdiş û her tewir polîtîkayî kurdan ser de yenê rewakerdene û remnayene.
Cinîya kurde dinya de veng da
Dewleta tirke hêrişê xo ant teberê sînorî. Başûr, Rojawan û Rojhelatê Kurdistanî mird nêkeno, hêrişê kurdanê Ewropa zî kena. Teberê welatî de zî kurdî yenê qetilkerdene. Qet huqûqê mîyanneteweyî, exlaq û merdimîye nas nêkena. Dinya zî têna hêrişan seyr kena. Hêzê kurdan û taybetî yê cinîyan tewr peynî Îran de û xoverdayîşê Sûrîye de ame dîyene. Cinîyanê kurdan xo îspatê dinya kerd. Cinîyanê kurdan bi xoverdayîş û têkoşînî dinya de veng da. Welatan îstîxbaratê xo vera kurdan û taybetî vera cinîya kurde kerd yew. Çimkî hêzê hegemonîkî zanê ke hêzê komelî girêdayeyê cinî yo. Bado ke kurdan Rojawa de DAIŞ bin vist, Erdogan û hetkarê ci har bîyî û kenê ke heyfê xo bigêrî. Pêro dinya vera astengkerdişê pêvînayîşê rayberî reyde, hêrişanê kîmyewî, bêexlaqî û qirkerdişî de bêveng a. Babeta kurdan de bêvengmendişê dewletan paştîdayîşê înan nîşan dano.
Deskewtişê Rojawa bi keda cinî û pêro şervanan ame destfînayene. Tirkîya nê destkewtişan rê tehammul nêkena. Aye seba binkewtişê Rojawa û heme kurdan paştî daye û dana DAIŞ û hêzanê paramîlîteran. Bi nê hêrişan derb gineno destkewtişê cinî û kurdan. Ganî destûr nêdîyo yewna qetlîyamêk û kurdê xayînî hewnê gulgulî ra hîşyar bibî.
