Keyeyê Gulîstan Dokuye waşt ke walîyê Dêrsimî reyde pêvînayîş bikero la waştişê înan nêame qebulkerdene. Maya Gulîstane vat: “Wezîrîya Edaletî soz dabî ma la berî ma rê ameyî qefilnayene.”
Wendekara Zanîngehê Munzurî Gulîstan Dokuye ra 5ê zemherîya 2020î ra nata Dêrsim de vînî bîyaye ya. Keyeyê Gulîstan Dokuye derheqê babete de verê Walîtîya Dêrsimî de eşkerayîye daye û aqîbetê kênaya xo pers kerd. Eşkerayîye de Serekê Baroyê Dêrsimî Kenan Çetîn û Platformê Cinîyan ê Dêrsimî zî amade bîyî.
Keyeyê Gulîstan Dokuye dima waşt ke walîyê Dêrsimî reyde pêvînayîş bikero la waştişê înan nêame qebulkerdene. Naye ser o keyeyî nêrazîbîyayîşê xo mojna û vat: “Walî ramekewe Gulîstane bivîne.”
Serekê Baroyê Dêrsimî Kenan Çetînî protestoyê keyeyî de vat: “Sey baroyî ma vergumanê verênî û babîyê ci ser de vindenê. Eke no serebût nêro zelalkerdene, mîyanê serebûtî de nameyê kamî bivîyaro ma do gerreyê înan bikerê.”
Dadîya Gulîstane Bedrîye Dokuye zî qiseykerdişê xo de îfade kerd ke mengêke verî Wezîrê Edaletî de pêvînayîş kerdo. Bedrîye Dokuye vat: “Wezîrîya Edaletî ma rê vat ke Zainal Abarakov do sey vergumanî bêro muhakemekerdene. Înan soz da û ma agêrayî keyeyê xo. Labelê dima pêro berî ma rê ameyî qefilnayene.”
