Parka Rojawanî ya Taxa Peyasî de,  bi nameyê “Platformê Şîyar Be!” Vera Tîryakî Koma Têkoşînî ameya ronayene, “Platformê Şîyar Be”  Vera Tîryakî do vera vilabîyayîşê madeyanê Hişbiran, Peyas de koma têkoşînî  ameya ronayene. “Vera tîryakî bêveng memane” û tehlukeyê madeyî ke bêhiş kenê, ma pîya vengê xo berz bikerê. Vera nê sîstemî ke komelê ma hermneno, seba ke ma taxe, gede û ameyoxê xo bipawê, ma veng danê ke heme şarê ma û rêxistinê demokratîkî piştî bidî nê rayîrşîyayîşî. Vera tîryakî têkoşîn, pawitişê cuye yo! Ma pîya rayîr ra şêrê, pîya bibedilnê!”

Taxa Peyasî de kome amey ronayena  û koma deyîrbazan zî  bi deyranê  xo vengda şarî da û pîya govende tepişte. Ê yê ke tewrê na koma çalakî bîyê Hemşaraderîya Bajarê  Newî Safîye Akdag û Memet Ergun û zaf komelî beşdar bîyî. Seba ronayîşê kome, Verfekê Platformê Şîyar Be! Têkoşînê Vera Tîryakî ra Murat kanî qisey kerd û dima zî Mehmet Ergunî qisey kerd  û vat ke ma vera nê tiryakîyan, çi kar û gure ma dest ra bêro, ma ko bikerê.

Hemwelatijî ke tewrbîyîşê ronayena na kome bîyê, înan ra Deyîrbaz Mehemedê Şêxmîrî, Memet Gultekîn, Fîkrî Serîn û Sadet Kurtî rojnameyê ma rê qisey kerd.

Mehemedê Şêxmîrî dîyar kerd ke şarê Amedî gelê bira gelê wayan, no yew çîyo ke merdimi hiş ra keno , aqilê kê  sere ra vejeno esrar û heb ê. Şima zî zanê ke zaf zerarêke dano qijanê ma ro, kênanê ma ro û komelê ma ro. Şêxmirî wina vat:” Bêrê ma pîya dest bidê yewbînan, ma xo mîyan ra nê çîyanê xiraban  vejê û no zaf yew çîyêko pîs o. Welatê ma rê nêbeno û zaf çîyêko eyb o, şerm o û xirab o.” Çunke ciwanê ma yê 9 serre yî, 10 serre yê, 15 serre yî 19 serre yî,  pêro nê çîyanê hişbiran ancenê û yenê keeyyê xo de û taxa xo de bêrehetîye kenê. Şêxmirî wina domna: ” Nê warî de wa yew nêvajo  ke  nê çîyê xirabî nêresenê keyeyê mi, eke ma vernîya ci nêgîrê, nê çîyê xirabî kewenê keyeyê ma hemînan. Ganî ma vera nêdê ke nê esrarî dewan de biramîyê û ma heme zerarê nê çîyan şarê xo rê bidê famkerdiş û ma vernîya ey bigîrê. Eke ma ey ro vernî nêgirê, badî zî ma nêvajê ax û wax.” Şêxmirî wina peynîya qalanê ard;  “Şarê Amedî, way û birayî bêrê ma piştî bidê yewbînan û ma vernîgirotişê nê çîyanê xiraban bigîrê û eke vernî nêgîrê, badê zî ma zaf poşman benê.  Hînê poşmanî zî feyde nêkena.

Gedeyê ma kewtî kuçeyan

Hemwelatij Fikrî Serînî vat ke; “Seba ko ma nê ciwananê xo nê çîyanê xiraban û qirêjan ra bixelisnê, ma ganî yew xebata başe bikerê, çunke ciwanê ma pêro kewtî kuçeyan û ma dest ra şîyî. Serînî wina vat:” Nê warî de, wa yew nêvajo ke nê çîyê xirabî û qirêjî  nêresenê ma eke ma vernî nêgîrê adir keweno keyeyanê ma hemînan.” Serînî wina qalê xo qedênayî, “No sebeb ra zî ganî ma dest bidê yewbînan û yew xebata weşe bikerê û ma gedeyanê xo û ciwananê xo  vera çîyê qirêjan ra bixelisnê.”

Ganî ma gede û ciwananê xo bixelisnê

Hemwelatij Sadet Kurtî vat, “Seba ke ma emşo vera tirîyakî  kom bîyê û no warî de çend rayî ke meşe û çalakî virazîyayê. Sadet Kurtî wina vat: ”Ma wazenê ke ciwan xo û gedeyanê xo, vera nê çîyanê qirêjan ra bixelisnê.” Sadet Kurtî wina dewam kerd vat, “Nê warî de adir kewto  keyeyanê ma hemînan û no sebeb ra zî  ma peştî bidê yewbînan û ma vera nê sîstemê qirêjî  têkoşîn bidê. Taybetî şerê taybet bi zanayeyî, gedeyê ma û ciwanê ma antî na rewşa qirêjine. Nê çîyê qirêjinî ke benê, mîyanê înan de gedeyê welatparêzan zî estî. Sadet wina peynî arde; “No sebeb ra yo ke nİka ra pey karê ma hina zaf giran beno û ganî heme kes dest bido yewbînan, ma gedeyanê xo nê çîyanê qirêjan ra bixelsnê.

 Gedeyê ma hewayêko dekewenê yew gola awe û vinî benê

Hemwelatij Memet Guktekînî dîyar kerd ke ma ganî ciwananê û gedeyanê xo bi qiseyanê weşî vera nê çîyanê xiraban bixelsnê.  Guktekînî wina vat.” Çimkî ciwanê ma yew bi yew, hewayêko dekewenê yew gola awe û xenikîyenê, ma dest ra şonê û vinî benê.” Seba vernîgirotişê tirîyakî, ganî heme komelê ma yê sivîlî û rêxistinî keye bi keye û taxe bi taxe bigeyrê ,ciwanan îkna bikerê. Guktekînî wina qedêna; “No war de,  ganî heme keyeyî paştî bidê yewbînan, encax ma wina eşkenê gedeyanê xo tirîyakî  ra bixelisnê.”