Mersin de vizêr hetê Meclîsê Cinîyan ê DEM Partî, Têgêrayîşê Cinîyan ê Azadan (TJA) û Komeleya Rojnamegeran ê Cinîyan ra semedê rojnamegeran Gulîstan Tara û Hêro Bahadînê ke 23yê tebaxe de qezaya Seyîdsadiqî ya Silêmanî de bombardumanê dewleta tirke de şehîd bîyî, çalakîya protestoyî ameye kerdene.

Îdarekarê DEM Partî, Komeleya Heqanê Merdiman (ÎHD) û Partîya Karkeran a Tirkîya (TÎP) yê Mersinî û xeylêk kesî tewrê çalakîye bîyî. Çalakîye de sloganê sey “Jin jiyan azadî” û “Bijî berxwedana çapemenî” ameyî vatene.

Eşkerayîya çapemenîye de nê ameyî vatene: “Dewleta tirke warê şerî hîra kerdo. Wazena heme Kurdîstanî îlhaq bikero. Herêma Federe ya Kurdîstanî bena hemkarê qetilkerdişê ewladanê kurdan. Şarê Kurdîstanî nê çirey qebul nêkeno. PDK ganî cade hemkarîya nê sûcan caverdo. Îqtîdarê AKP-MHPyî hêrişê xo yê vera şarê kurdî û destkewteyanê ci de eynî wextî de destkewteyanê cinîyan hedef geno. Embaza ma Nagîhan Akarsele zî netîceya nê hêrişan de Silêmanî de ameye qetilkerdene. Wa no bêro zananeye ke kedkarê çapemenîya azade ke rêçê heqîqetî de yê do çirey qelemê embazanê xo erd de nêverdê û peynî do vengê heqîqetî vejîyo meydan. Wa sereyê pêro şarê Kurdîstanî weş bo. Ganî heme şarê kurdî û rayapêroyîya demokratîke vera nê qirkerdişî tewir bîgêro.”