Serekê Komeleya Kulturî ya Pîr Sultan Abdalî Cuma Erçeyî îfade kerd ke hesabpersayîş têna meseleya elewîyan nîya û wina vat: ”Ganî nê sîstemê qirker, kolonyalîst, cîyakerî ra hesab bêro persayene.”

Cuma Erçeyî ard ziwan ke keyeyanê qurbananê Qirkerdişê Sêwasî komîsyonêk awan kerdo û no komîsyon seba ke qirkerdiş nêro vîrakerdene, dewa bêra teqîbkerdene xebitîyeno. Erçeyî vat: “Ma Anqara de kombîyayîşêko pîl kerd, kitabxaneyêko dîjîtal awan kerd. Nê kitabxaneyî de agahîyê taybetî yê serê qirkerdişî est ê. Nika muzeyêka dîjîtale yena awankerdene. Seba serra 30. fîlmo dokumenter ame amadekerdene. Ma şîyî zîyaretê keyeyanê qurbanan. Ma Hêzanê Kede û Demokrasî yê Sêwasî reyde kombîyayîş kerd. Ma peyê ê edaletî de yê ke 30 serrî yo nêameyo caardene.”

Erçeyî da zanayene ke Qirkerdişê Madimakî têna meseleya elewîyan nîya; meseleya komelê Tirkîya ya û no qirkerdiş vurîyayo tradîsyonêkê dewlete. Erçeyî îfade kerd ke têkoşînê bêmabênî yê hêzanê demokrasî ra ber çareyêka bîne çin a û vat: “Eke na dewlete hesabê Qirkerdişê Mereşî bidîyêne û tede têrî bîyêne Derbeya 12ê Êlule nêbîyêne. Eke komel Madimak de têrî bibîyêne Gazî nêbîyêne. Eke Gazî de têrî bibîyêne Qirkerdişê Roboskî, Pirsûs û Garî nêbîyêne. Seba ke sey Sêwasî qirkerdişê neweyî bêrê kerdene binge yeno amadekerdene. Coka hesabpersayîş têna meseleya elewîyan nîya. Ganî nê sîstemê qirker, kolonyalîst, cîyakerî ra hesab bêro persayene. Xizanî, vêşanîye, kiştişê cinîyan, tecawuzê vera domanan, çimeyê nê pêroyîyan yew o. Pêro zî seba ke nê welatî de demokrasî çin o qewimîyayê.”