Bi serrkêşîya TJA Amed ra ver bi Anqara bi şîarê “Ma Bi Hêvîye Ver Bi Azadîye Rayra Şinê” rayraşîyayîşî dest pêkerd. Cinîyî vera tecrîdî, seba pîlkerdişê azadîya cinîyan û yewîya şaran a demokratîke rayra şinê. Armancê rayraşîyayîşî yo bîn pawitişê cuye û awankerdişê aştî yo. Cinîyî vanê ke ê seba rijnayîşê pergalê kedewerdişî, seba sazkerdişê cuya têduşt û azade rayra şinê. Rayraşîyayîş de vera polîtîkaya înkar û asîmîlasyonî, seba pawitişê nasname û kulturî zî îradeyêko pîl est o.
Rayraşîyayîş de bêşik azadîya Rayberê Şarê Kurdî armanco serekeyî yo. Êdî zanîyeno ke Ocalan aktorê prosesê Aştîye û Komelê Demokratîkî yo serekeyî yo. Ey sey sermuzakerevan hetkarîyêka pîle daye nê prosesî. Vengdayîşê ey yê 27ê Sibate ra dima atmosferê sîyasetî bedilîya. Hukmatê Erdoganî goreyê reftarê Ocalanî polîtîkaya xo dîyar kerde. Baxusus Ocalanî vat ke wa parlamento de komîsyon bêro awankerdene û binê serbanê parlamentoyî de heme persî bêrê nîqaşkerdene. Na çarçewa de rolê Ocalanî xeylê pîl o. Ganî komîsyon ey reyde desinde bêro têhet û ge-ge fikrê ey bigêro. La komîsyon rexneyan û pêşnîyazan goşdarî nêkeno. Rojêke cîranêkê Nasrettîn Xoceyî şino keyeyê Xoceyî, ci rê vano ke “cinîya mi kincî şutî, seba wefîştişî ci rê la hewce keno”. Xoce vano ke “la veng nîyo, mi serê ey de ardî fîştî ra.” Cîran şaş beno û vano ke “serê layî de ardî yenê rafîştene?”. Xoce cîranê xo xapêneno. Homa bikero ke komîsyon zî wina nêkero.
Bîsîklete û mîlçik/e
Çend rojan verî Serekê Parlamentoyî Numan Kurtulmuşî ard ziwan ke “Bîsîklete yew pedalî reyde nêna ramitene”. Sey ey verê cû Serekê Pêroyî yê MHP’yî Devlet Bahçelî zî vatbî “mîlçik/mîlçike yew perrî reyde nêpereno/a”. Gelo pedalo bîn, yan perro bîn kam o? Bêguman hukmat o. Xora têgêrayîşê azadî yê kurdan çi ke dest ra ame kerd û keno. Tîya de hukmat bêveng o û hîsgêr nîyo. Ci rê çend reyî ame pêşnîyazkerdene ke wa komîsyon şero Îmrali û Ocalanî reyde bêro têhet. La nêşî. Hem pêvînayîş nêkeno, hem zî vano ke “bîsîklete yew pedalî reyde nêna ramitene”.
Kolonîzasyon û demokrasî
Kurtulmuşî qiseykerdişê xo de vat ke “wa Rojawan goreyê vengdayîşê Ocalanî têbigêro”. Tîya de zî nakokîye est a. Aqlo ke prosesê Aştîye û Komelê Demokratîkî de çekuya Rojawanî şuxilneno û qalê merkezperestîye keno, zerar dano prosesê demokratîkbîyayîşî. Aqlo ke Tirkîya û Kurdîstan de demokrasî armanc keno, ganî Sûrîye de zî demokrasî û pergalê federatîfî bipawo. Sûrîye de “kolonîzasyon”, Tirkîya de “demokrasî” nêbeno. Coka kurdê ke Rojawan de wazenê xo îdare bikerê, pergalê federatîfî awan bikerê û hemwelatîya têduşte saz bikerê, vernîya Anqara de “astengîye” nîyî.
Persanê giranan rê çareserîye
Êdî ganî komîsyon wezîfeyê xo bîyaro. Heta nika 13 kombîyayîşî virazîyayî. Ganî cade peynîya nê kombîyayîşan bêro. Verê komîsyonî de xeylêk persê giranî est ê: Yewin, Ocalanî reyde têdîyayîş, dideyin, ziwanê kurdî rê statu, hîrêyin naskerdişê nasnameyê elewîyan, hîrêyin têrîameyîşê qetlîyamanê seserra XX., çarin heme tepişteyan rê azadîye û qanûnê înfazî de bedilîyayîş. Komîsyon ganî nê persan reyde eleqedar bibo û raporê xo yê hîrayî amade bikero.
