Hemserekê OHDyî yê Amedî Riza Polatî çarçeweya grevê vêşanîye de îfade kerd ke ganî heme komel veng bido xoverdayîşî.

Grevê vêşanîye yê tepişteyan ê vera tecrîdê serê Serekê PKKyî Abdullah Ocalanî dewam keno. Çalakîya ke çarçeweya hemleya Abdullah Ocalanî rê azadîye, meseleya kurdan rê çareserîya sîyasîye de 27ê teşrîna peyêne de dîyaye destpêkerdene do heta 15ê sibata 2024î dewam bikero.

Polatî destpêkê qiseykerdişê xo de ard ziwan ke înan sey komele Xarpêt, Meletî, Amed û Erzingan de zîndanî zîyaret kerdî, çalakwananê grevê vêşanîye reyde pêvînayîşî kerdî û vat zîndanan de problemê giranî est ê.

Polatî bale ante polîtîkaya bêçareyîye ya meseleya kurdan a îqtîdarê AKP-MHPyî ser û nê vatî: “Ewro zîndanan de waştişo meşru est o. Yeno waştene ke wa tecrîd bêro wedaritene û meseleya kurdan bêro çareserkerdene. Tepişteyî bi grevê vêşanîye wazenê ke wa dewlete huqûqê xo bîyaro ca.

Eslê xo de şarê kurdî seserre yo ke binê tecrîdî de yo. 1999î ra nata şexsê Birêz Ocalanî de tecrîdo fîzîkî dewam keno. Seserre yo bi zorî yeno waştene ke wa şarê kurdî ziwan û kulturê xo ra bêro raqilnayene. Coka raştê qirkerdişan ameyo û vengê ci zî hetê dinya ra nêameyo eşnawitene. Şarê kurdî sey tim ewro zî vera polîtîkaya çînkerdişî xover dano.

Qedexeyê seyrkerdoxanê Amedsporî ra heta astengkerdişê eşkerayîyanê çapemenîye, astengkerdişê huqûqnasan, qedexekerdişê kombîyayîşan, zîndaneştişê sîyasetmedaranê kurdan îradeyê şarî kurdî yeno tecrîdkerdene. Eslê xo de tecrîdê fîzîkî yê vera Birêz Abdullah Ocalanî ra wetêr tecrîdo fikrî est o. Çekuya tecrîdî zî yena tecrîdkerdene.

Îqtîdar demê peyênî de kam ke vera ci yo, bi zîndan, îşkence û mergî tehdît keno ke verê ci bîgêro. Ganî dezgeh û sazgehî mîsyonê xo hol bizanê. Sere de baroyî ganî heme dezgehê heq û huqûqî prosesê grevê vêşanîye teqîp bikerê û vengê tepişteyan bidê eşnawitene ke waştişê înan bêrê caardene. Grevê vêşanîye îqtîdarî rê mesajêk o, semedê sînorê ehlaqî û peymîyanê etîkan vengdayîşêk o. Îqtîdar ganî nê şansî bêcewab meverdo û newe ra şertanê çareserî bierjno.

Seba ke netîceyê giranî sey grevanê verênan meqewimîyê, ganî ma pêro pîya cade goştarîyê nê vengî bikerê û paştî bidê ci. Seba ke aştîya komelkî bêro caardene ma veng danê ke wa her kes destê xo bikero binê kerra. Eynî wextî de ma veng danê îqtîdarî; verê ma de raştîyêka prosesê çareserî est a. Nê demî de huzûrê şarî bîbî. Ma vînenê ke şer û polîtîkayê şima yê asayîşî çare nêbenê. Zîndan de yeno vengdayene ke wa dewlete reyna agêro çarçewaya ehleq û huqûqî.”