Cinîyanê ke seba veradayîşê Aysel Tugluke kampanyaya îmzayan dabî destpêkerdene vat: “Ganî polîtîkayêka cesaretîne bêra teqîbkerdene. Ma eşkenê pîya ser bikewê.”
Sîyasetmedara kurde Aysel Tugluka ke Zîndanê Kandira de tepişîyena, her ke şino rewşa ci ya weşîye bena giranêre. Seba ke Tugluk bêra veradayene hetê cinîyan ra kampanyaya ‘Seba Azadîya Aysel Tugluke 1000 Cinîyî’ dîyabî destpêkerdene. Sere de Amerîka, Almanya, Avusturalya, Swîsre, Belçîka, Îngilîstanî, Fransa û xeylêk welatanê dinya ra seba Tugluke bi hezaran cinîyî paştî danê kampanya.
Cinîyanê ke seba veradayîşê Aysel Tugluke kampanyaya îmzayan dabî destpêkerdene Ajansê Mezopotamya rê qisey kerd.
Wekîla verêne ya Partîya Demokratîke ya Şaran (HDP) Asîye Kolçak dîyar kerd ke şexsê Tugluke de cinîyî yenê lînçkerdene û vat: “Îqtîdar wazeno cinîyan ê tepişteyan ra qesas bigêro û coka Tugluke vera nêdîyena. Çunke îqtîdar cinîyan ê kurdan ra tersena. Tugluke sîyasetmedar a. Şexsê aye de îradeyê şarê kurdî û heqê merdiman nêhesibîyenê. Vera kurdan polîtîkaya çinkerdişî yena caardene. Mabênê raporanê Dezgehê Tipê Edlîyî (ATK) û raporê Unîversîteya Kocaelî de nakokîye esta. Dezgehê Tipê Edlîyî bi dezgeh û noterê AKPyî. Seba ke ma vengê xo bidê eşnawitene ganî polîtîkayêka hîsger û cesaretîne bêra kerdene.”
Hunermende Pinare Aydinlar bale ante polîtîkayanê vera Tugluke ser û pare kerd ke îqtîdar vera muxalîfan polîtîkaya dişmenîye keno. Aydinlare vat: “Ganî cuye û weşîya tepişteyan binê asayîşî de bibê. Cenazaya dadîya aye ra nata vera Tugluke polîtîkayêka faşîste esta.”
Kaykerdoxe Denîz Turkalî vat: “Wa her kes paştî bido kampanya. Mi seba ke wayîra rûmetê merdimîye vejîya na kampanya îmza kerde. Ma têna wazenê ke Tugluke bêra veradayene. Ganî pêro cinîyî na kampanya îmza bikerê. Eke ma yew bibê do ser bikewê.”
Komeleya Wextê Cinîyan ra Dîlek Başalane vat: “Veranêdayîşê Tugluke binpaykerdişê heqanê merdiman o. Vera têkoşînê cinîyan ê kurdan hêrişê pîlî estê. Tepişîyayîşê Ayşe Gokkan, Leyla Guven û Aysel Tugluke zî nîşaneyê ney ê. Wa her kes na kampanya îmza bikero. Wa pêro tepişteyê nêweşî bêrê veradayene.” STENBOL
