Îqtîdarê AKP-MHPyî weçînayîşanê 31ê adare ra tepîya hewntersan vîneno. Sey merdimo ke kontrolê xo vîndî kerdo, her ca rê “girmikan” erzeno. Lastîkê kamyone weçînayîşê herêmî de teqa û nika kamyone bê kontrol şina. Erdogan Don Kîşot o, Bahçelî zî “yawerê” ci Sancho Panza yo. Panza eslê xo de zaf qeşmer yan nangermin o. Don Kîşot ferman dano, Panza cade ano ca. Nê rojan hem Don Kîşot hem zî Sancho Panza zaf “lezokîye” kenê. Çike peynîya xo vînenê. Şarî sîndoqan de înan rê “rayîr” ramojna.
Erdoganî weçînayîş ra dima bi lezokîye dest pê pêvînayîşanê şerî kerd. Çike heta nika îqtîdarê xo bi gonî awan kerd. Seraya ci bîya merkezê girewtişê gonî. Seba ke Başûrê Kurdistanî îşxal bikero, raver şî Bagdad û tayê peymanê qilêrinî kerdî. Dima ra şî Hewlêr. Îdareyê PDKyî seba Erdoganî her tewir “qesmerîye” kerde. Kuçeyê Hewlêrî bi alayanê tirkan xemilnayî. Yew zî Kelaya Hewlêrî bi alaya tirkan a girde xemilîyaye. No reftar xeylê ame nîqaşkerdene. PDK êdî “berbanîya” rejîmê Erdoganî keno. Bi taybetî keyeyê Berzanîyan bi hawayêkê kurî girêdayîyê hukmatê Anqara yo. Estbîyayîşê ey êdî pabesteyê Anqara yo. Şaristananê Tirkîya de bîla Erdogan rêzdarîyêka winayêne nêvîneno.
Badê ke zîyaretê Hewlêrî bî, cade Stenbol, Anqara û Belçîka de vera çapemenîya azade hêrişê gemarinî qewimîyayî. Nê hêrişî bi hawayêkê profesyonelî ameyî serûberkerdene. Baxusus Belçîka de vandalîzm peyda bî. Polîsanê Belçîka eşt studyoyayanê Medya Haber TV û Stêrk TV ser. Nê sereştişan de nêzdîbîyayîşê polîsan zaf “hovî” bî. Xeylêk malzemeyî û komputurî gêrîyayî pê. Serkeyanê odayan ameyî letekerdene. Bi kilmî polîsanê Belçîka sey polîsanê tirkan têgêrayo. Wina aseno ke îstîxbaratê tirkan ra “ferman” girewtê. Belçîka zî “emirberîya” Erdoganî kena.
Ewropa bazirganîye kena
Her kes zano ke Belçîka paytextê Ewropa ya. Merdim heqanê merdiman, demokrasî û huqûq paweno. La merkezê Ewropa de heramîye qewimîyaye. Îdarekaranê Belçîka eşkera kerd ke Fransa no sereştiş waşto. Yanî na heramîye de destê fransizan zî est o. Ewropayijî pêro pîya xizmetê dîktator Erdoganî kenê. Kam çi zano, ey ra çiqas “mingirî” girewtî. Demokrasîyê Ewropa seba 5 “quriqşan” roşîyeno. Bazarê heqanê merdiman virazîyayo. Erdogan peranê xo dano, karê xo dano kerdene. Na bazirganîye de zafane kurdî sey “qurban” hesibîyenê. Erdogan sîparîş dano, hukmatê Ewropa hêrişê vera kurdan kenê. Endamê NATOyî hemkarîye virazenê û refleksê qilêrinî nawnenê.
Otokrasî metastaz de yo
Hêrişi bi taybetî Roja Rojnamegeranê Kurdan de ameyî kerdene. Kamcî ercê kurdan ke est ê, raştê nîjadperestan yenê. Nîjadperestî wa baş bizanê ke kurdî armancê xo zanê û qetî têkoşînê azadîye ra fek vera nêdanê.
Ewro yan siba otokrasîyê Erdoganî do birijîyo. Seke Hegelî vat, “her awanîya ke resena astêke, werte ra wedarîyena.” Êdî îqtîdarê dizdan metastaz de yo. Dermanê na nêweşîye çin o.
