Vengê to dûrî ra ame
Vengê a lawuke ra ame
Vengê vayî ra ame
Ame û rest zê Xizirî
Saeta min a tenge de
Vengê to
Derdê mi rê bî derman
Derdê mi berd dûrî
Vengê to
Zerê mi kerd şên
Çê mi kerd şên
Vengê to ke kot cuya mi
Dîna mi vurîye
Çerexîye rindîye, rindekîye.
***
Vengê to
Vengê haskerdene wo
Vengê esqî yo
Vengê to
Dîyaxê zerê min o.
***
Vengê to ke ame mi
Ez perena ra
Bena mîlçike
Çê to de nîsena
Vengê ma ke rest jubînî
Ma benîme ju
Virare fîme jubîn ra
Pîya na dîna xelesnenîme.
***
Vengê to
Vengê xoverestene wo
Mi ano ra xo ser
Saye ke maya xo ra
Newe yena dîna
Newe bena
Newe ra virazîyena.
***
Vengê to
Dirvetê mi melem kerdî
Kerdî weş
Vengê to
Dejê mi vindarnayî
Waya delale!
***
Ez bê vengê to
Hedere nêkena
Solix nêcena
Vengê to ke nêyame gosê mi
Roja mi bena roja şîya ye.
***
Vengê to ke nêyame
Per û payê mi şîkînê
Dîna mi sere bena teng
Bena tarî
Asme cerîna
Tîjî nêvejîna
Dîna roştî nêbena
Vengê to ke nêyame
Hewrî yenê ra
Va yeno
Biruskî erzenê
Silîye vorena
Silîye
Vengê to
Mi rê ana
To mi rê ana.
***
Ma rojade wisarî de
Silî û sepelîye de
Rastê jubînî bîme
Koyê Jele
Vore ra sipî kerdêne
Çemê Pilêmurîye ameybî ra zon
Pêl dêne
Derê Rojî ra laşer amêne
Derê Şerxanî bîbî şên
Çef kerdêne.
***
Hata ke o sodir
Vengê a lawuke ra
Vengê to mi rê ame
Ti zerê mi de
Esqilîyayîs bîya
Wayîs bîya
Cinîka rindeke bîya
Zê astarêyî
Zerê mi de sewle dênê.
***
Nika kî
Vengê a lawuke ra
Vengê vayî ra
Vengê ma bî jû
Ez to rê bîyêne malîm
Bîyêne vengê zonê kirmancîye
Bîyêne vengê kirmancîye
Vengê Dêrsimî
Vengê Hardê Dewrêşî
Vengê welatî
Vengê cinîyan.
***
Ti kî mi rê
Telebeya virên a
Hevala roştî ya
Zê namê xo
Milaketa min a rindî ya
Melekorîya serê sodîrî ya.
***
Endî vengê ma ke rest jubînî
Pê destê jubînî cenîme
Verva çemê Mûnzirî de
Wurzeme ra payî
Pîya welatê xo kenîme roştî
Ebe vengê jubînî
Na tengîye ra xeleşînîme.
Çime: Ozlem Guntaş, Mi Serm Ca Verda, Weşanxaneyê Nameyî, Ankara, 2024, rr. 13-18.
