Tayê merdimî est ê, bi fikr û reftarê xo eşkenê şoriş bikerê yan verê şorişî akerê. Dinya de nê merdimî zaf nîyî. Mîsal Lenîn nînan ra yew bî. Hem teorî hem zî pratîk de şorişê sosyalîstî yê Rûsya rê serkêşîye kerde. Mîsal Che Guevara welatê xo Arjantîn ra vejîya, derbasê Kuba bî û şoriş de rolêko dîyarker kay kerd. Mîsal Afrîkaya Başûrî de Nelson Mandelayî vera serdestîya Sipîyan reftarêko şorişger û qerardar ramojna, bedelê giranî dayî û peynîye de şarê xo xelesna. Tarîxê merdimîye nê rojan îradeyê şorişgerî yê bînî rê şahidîye keno. Serekê PKKyî Abdullah Ocalan pêşnîyaze û fikrîyatê xo reyde tarîx nuseno.
Vengdayîşo ke ewro virazîya, komelî rê xeylêk perspektîfan pêşnîyaz keno. Ocalan vano ke PKK seserra XX. de netîceya înkarê raştîya kurdan û qedexeyanê vera azadîye de peyda bî. Xora hertim analîzanê xo de nuseno ke eke cayêk de înkar est o, uca de “îsyan” yanî serewedaritiş zî qewimîyeno. Eke netewe-dewlete despotîk nêbîyêne, eke estbîyayîşê kurdan nasbikerdêne, eke hemwelatîya têduşte awan bikerdêne ewro rewşa bîne bîyêne. Netewe-dewlete eksê ci kurdan û kêmneteweyîyanê bînan rê “bindestîye” ferz kerde. Gelo Kurdan se kerd? Seba estbîyayîşê xo dest pê têkoşînê rûmetinî kerd. Seke fîlozof Epîktetos vano, “merdimo ke efendîyê çarenûsê xo yo, azad o.” Kurdan destûr nêda ke wa serdestî ameyoxê înan dîyar bikerê. Êdî pêro dinya zana ke kurdî efendîyê çarenûsê xo yê.
Aştîye û komelo demokratîk
Vengdayîşê Serekê PKKyî Abdullah Ocalanî de awankerdişê aştîye û komelê demokratîkî bale anjeno. Xora armancê têkoşînê PKKyî zî no bî. Ocalan ewro reyna mesuldarîya pîle geno xo ser û vano ke na seserre qetî komare de demokrasî bêro awankerdene. Çekuya demokrasî girîng a. Ganî merdim na çekuye ser o biney bifikro. Demokrasî têna weçînayîş nîyo. Azadîya îfadeyî, hemwelatîya têduşte, huqûqo xoser, azadîya çapemenîye, têduştîya cinsîyetî, ziwanê dayîke de perwerde, desentralîzasyon, cuya komunale leteyê demokrasî yê. Seserra XX. de Tirkîya de ma raştê nê çîyan nêameyî. Pergalo ke seserra XX. de est bî, pergalêko kanperest, cîyaker, qirker, dişmenê cinîyan, nîjadperest û mîlîtarîst bî. Demokrasî nê, “tîmokrasî” est bî. Yanî pergalê baronan est bî.
Naskerdişo huqûqî
Vengdayîşê xo de Ocalan veng dano ke wa PKK xo betal bikero û çekanê xo verado. PKK do na pêşnîyaza ey bi detay analîz bikero û qerarê xo bido. Bêguman çareserîya persa kurdan de têna veradayîşê çekanê PKKyî qîm nêkeno. Xora netîceya vengdayîşî de mefhûmê “naskerdişo huqûqî” zî est o. Yanî dewlete zî ganî gamanê xo bierzo. No proses têna bi destê yew terefî nêşino. Ganî dewlete wayîrê îradeyî bibo û goreyê nê vengdayîşî wezîfeyê xo bîyaro ca.
