Wendekaranê cinîyan ê Unîversîteya Munzurî derheqê akademîsyenê tacîzkerî de gerre kerd. Platformê Cinîyan ê Dêrsimî paştî daye wendekaran.

Wendekaranê cinîyan ê Unîversîteya Munzurî Serdozgerîya Komare ya Dêrsimî rê gerre kerd ke akademîsyenêkê beşê perwerdeyê domanan wendekarî tacîz kerdî. Platformê Cinîyan ê Dêrsimî derheqê îdîayan de Meydanê Seyîd Rizayî de eşkerayîyêke daye.

Nameyê platformî ser o Bişeng Asula eşkerayîye wende. Asula vist vîrî ke çend rojî verî zî 45 wendekaranê beşê edebîyatî vat ke ê raştê tacîzê mamostayê xo ameyê. Asula vat: “Derheqê Unîversîteya Munzurî de her roje îdîayê neweyî benê rojdem. Na rewşe ra verî rektorîya unîversîte mesuldar a. Çike ganî rektorîye derheqê nê îdîayan de tehqîqat bikera û tedbîran bigêra. Ma sey cinîyanê nê şaristanî do tim nê îdîayan teqîb bikerê. Wayê ma yê wendekarê unîversîteyî tena nîyê.”