Meclîsê Ciwanan ê DEM Partî Turnuvaya Futbolî ya Gulîstan Doku daye destpêkerdene ke Gulîstane Doku 5ê çeleyê 2020î ra nata vindîbîyaye ya.

Çarçewa kampanyaya ”Vera polîtîkayanê şerê taybetî, xoverdayîşo bêhempa” de, bi şîarê ”Pirodê-Ciwanî seha de yê” maço verên vizêr Dêrsim de ame kaykerdene.

Maçê verênî de di taximanê cinîyan kay kerd. Maçî ra ver sloganê sey ”Gulîstan Doku kotî de ya” û ”Jin Jiyan Azadî” ameyî vatene.

Parlamentera DEM Partî ya Dêrsimî Ayten Kordu, Hemşaredarê Dêrsimî Cevdet Konak, endam û temsîlkaranê dezgeh û rêxistinan maç seyr kerd.

Maç bi skorê 2-2yî qedîya.

Maçî ra verî Hemşaredara Depe Songul Duzgune qisey kerd û aqîbetê Gulîstane pers kerd. Cevdet Konakî zî vat ke ê do tim aqîbetê Gulîstane pers bikerê.

Aytene Kordu ard ziwan ke vera ciwanan polîtîkayê asîmîlasyonî yenê caardene.

19 taximî tewrê turnuva benê. Turnuva do 28ê gulane de biqeda.