Kişîyayîşê edîtora kovara Jineolojî Nagîhan Akarsele hetê Têgêrayîşê Cinîyan ê Kurdan ê Ewropa (TJK-E) ra ame şermezar kerdene.

TJK-Eyî vat: “Rejîmê AKP-MHPyî yê faşîstî û cergê xayinî PDKyî Silêmanî de edîtora kovara Jineolojî Nagîhan Akarsele bi barbarî qetil kerde. No serebût dewamê Qirkerdişê Parîsî û qirkerdişê Şukru Serhatan, Mehmet Zekî Çelebîyan o. Ma nê hêrişî şermezar kenê.

Bi rojan o pêro dinya de sloganê ‘cinîye, cuye, azadîye’ qirîyeno. Cinîyî vera serdestîya camêrdan wurzenê we. Dewleta tirke ya faşîste û hemkarê ci PDKyî Silêmanî de hêrişê serkêşanê cinîyan ra yew kerd. No hêriş vera xeta azadîya cinîyan, xeta îdeolojîke ya cinîyan ame kerdene û parçeyêkê konseptê îmha yê vera têgêrayîşê azadîye yê kurdan, hêrişê vera jineolojî yo.”

‘Cinîyan rê berê neweyî akerdbî’

Eşkerayîye de seba têkoşînê cinîyan rolê Akarsale ser o bale ameye antene û wina ame vatene: “Nagîhan Akarsele pê nuşteyanê xo cinîyan rê berê neweyî akerdbî. Nameyê TJK-Eyî ser o ma do hêrsê xo ganî verdê, xoverdayîşê xo mende bikerê, seba vîrameyîşê aye têkoşînê azadîya cinîyan bizêdînê.

Ma venga rêxistinanê cinîyan, bitaybetî cinîyan ê kurdan danê ke bi sloganê ‘cinîye, cuye, azadîye’ vejîyê waran û her ca de nêrazîbîyayîşê xo bimojnê.”