Îhlalkerdişê heqan ke tewr zêde Tirkîya de yeno ciwîyayîş, omidê şarî êdî selahîyetdaran ra, îdarekan ra nêmendo û şar ardişê edaletî bi nobetan rê girêda yo. Nobetê ke bîyê cayê qîrayîş û vengdayîşê dayîkan, hetê selahîyetdaran ra nînê vînayîş. La dayîkê waştişê xo yê edaletî, huqûqî de bi israr ê û ti hêz înan rê nêbeno asteng. Ne rewşa hewayî, ne mewsîmî ne zî tepiştişî.
Tewr verên ma bi ewnê nobeta dadîya Emîne Şenyaşare ra. Emîne Şenyaşar ke 2 laj û mêrdeyê ci ameyî qetilkerdiş; 9 Adara 2021 ra verê edlîyeyê Rihayî de dest bi nobete kerde. Verê çimanê Emîne de keyeyê ci hetê pawitox û merdimanê Îbrahîm Halîl Yildizî ra ameyî qetilkerdiş.
Emîne û lajê xo Ferît birîndar xelsiyayî û lajê aye Fadil zî ame tepiştiş. Dadîya Emîne tena wazenê ke edalet bêro ca û kiştoxî bêrê cezakerdiş. Lajê Emîne Fadil Şenyaşar 3 serrî yo hucreya yew kesî de yeno tepiştiş. Dadîye vera nê bêhuqûqî de mîyanê têkoşînêkê girs de ya. Demê nobete de çend rey rastê derb û tepiştişî ameye, nêweş kewte la reyna zî xo ver da û nobete xo rê dewam kerde. Her roje dadgerî, avûkatî û şar benê şahidê xoverdayîş û dejê dadîye. Vengê dadî resayo temamê dinya la selahîyetdarî vera nê vengî de xo kerrî rê dayê ro. La peynîya peynî do caardişê huqûqî ra nêeşkê biremê û do dadîye bireso edalet û waştişanê xo.
Nobeta ke bîn zî keyeyanê tepişteyan a. Tepişteyê ke binê tecrîd û her tewir tedayî de yê û nêeşkenê vengê xo biresnê rayaumumî, keyeyan Baroya Amedî û hîn bajarê bînan de dest bi nobete kerd. Nobeta Amedî 70 rojî ra zêdeyêr o ke dewam kena. Dadîye ke yenê baro û seba merdimanê xo dest bi nobete kenê, xeylêk sazgeh û dezgehî paştdayîş danê nobete. Waştişê keyeyan oyo ke tepişteyê nêweşî, înfazê ke ameyê betalkerdiş û tecrîdo ke yeno kerdiş peynî bibo. Nê demê peyîn de zîndanan de 7 kesî dinyaya xo bedilnayî û keyeyî wazenê ke peynîya tedayan bêro, êdî cenazeyî zîndanan ra nêvejîyê. Her çiqas hetê rayaumumî ra paştdayîşêk bibo zî la hetê selahîyetdaran ra tu gamêke nêameya eştiş. Dadîyî pabeyê edalet û azadîyeyê.
Nobetêke zî Dêrsim de hetê keyeyê Gulistan Doku ra ame destpêkerdiş. Gulistan Doku Dêrsim de Unîversîteya Munzurî de wendekara beşê Pêşdibistane bîye la 5 Çeleyî 2020 ra nata tu xeberêke ci ra nîna girewtiş. Gulistane tewr peyîn Zeinal Abarakovî dir amebî vînayîş. Serê vînîbîyayîşê Gulistane ra di serrî derbaz bi. Pêwa pêro lebata keyeyî serê serebûtî yeno padayîş û selahîyetdarî zanayîşêko somut keye rê nêdanê. Gelo bi Gulistane se bi û çira keyeyê Abarakovî nêwazeno na babete ser o cigêrayîş bêro kerdiş û astengî keyeyê Gulistane rê vejeno. Dêrsimo ke 24 saetî binê muşahedeyê kamerayan de yo la rêçe Gulistane nêvîneno. No helbet merdimî rê balkêş û sosret yeno. Ewro roj însanêke werte ra bibo vînî û selahîyetdarî vajê destê ma ra çîyêk nîno, merdim senîn eşkeno qalê asayîşê cuye bikero! Bi îdîayê ke xo eşta awa barajî de baraj ame vengkerdiş la çîyêk nêvejîya û no zî keye ser de tesîrêko negatîf kerd. Merdim xo bikero vera dadîya Gulistane o wext do bizano çiqas dejêko giran o. Dadîya ke kênaya xo seba bibo mamoste, seba biwano şawite Dêrsim la nika rastê rêçêke kênaya xo nîna. Hem omidê dadîye rijnayî hem cigera aye veşnayî. Fîxanê û hawarê dadîye her roje Dêrsim de zimî dano. Çemê munzur pêl dano vera nê sewtî de!.. Helbet peynîya peynî do dadî edalet û aştî bîyarê nêwelatî. Bi xoverdayîş û nobetanê xo, do bi veng û awazê xo û bi dej û omidê xo…