Almanya de derheqê aktîvîstê kurdî Ciwan Çewlîkî de bi waştişê dewleta tirke dewa amebî akerdene. Mehkemeya Hannoverî vat kiriştiş û propagandaya flamayanê YPG û YPJyî sûc nîyo.
Aktîvîsto kurd Ciwan Çewlîko ke xeylêk wext o ke Almanya de xebatanê huner û sîyasîyî rayra beno seba ke 20ê temmuza 2019î de semedê paştdayîşê YPG/YPJyî vejîya sehne Wezîrîya Edaletî ya Tirkî derheqê ey de cipersayîş dabî destpêkerdene.
Bi waştişê Tirkîya Mehkemeya Berze ya Edaletî yê bajarê Hannoverî yê Almanya derheqê hunermend Ciwan Çewlîkî de dewa akerde. Çewlîk vizêr Hannover de vejîya mehkeme. Heyetê mehkeme vat kiriştiş û propagandaya flamayanê YPG û YPJyî sûc nîyo.
Ciwan Çewlîkî badê qerarî ANFyî rê qisey kerd. Çewlîkî ard ziwan o do tim paştî bido YPG/YPJ û Şorişê Rojawanî û vat: “Ma heqdar ê û ma do tim vera neheqîye vejîyê.”
Wezîrîya Karanê Zereyî yê Almanya 2ê adara 2017î de beyraqê PYD, YPG/YPJ û posterê Rayberê Şarê Kurdî Abdullah Ocalanî zî tede xeylêk sembolê Têgêrayîşê Azadîye yê Kurdî qedexe kerdbî la xeylêk bajaranê Almanya de mehkemeyê herême qeraran genê ke beyraqê YPG/YPJ û PYDyî sûc nîyê.
