Parlamenterê HDPyî yê Kocaelî O. Faruk Gergerlîogluyî da zanayene ke zîndananê Tirkîya de tepişteyî mergî rê ameyî caverdayene û uca de dramê pîlî qewimîyenê.

Parlamenter Omer Faruk Gergerlîogluyî derheqê rewşa zîndananê Tirkîya û binpaykerdişê heqanê tepişteyan de ANFyî rê qisey kerd.

Gergerlîogluyî îfade kerd ke Tirkîya nîsbetê zîndanan qasê se ra 89,3yî zêdîyayo û vat: ”Kapasîteya zîndanan dekerde ya. Nika meseleya tewr pîle na ya. Her roje tepişteyî benê nêweş û hûmara tepişteyan zêdîyena. Nika zîndanan de nîsbetê mergî zaf berz o. Rûsya ra pey tewr zaf zîndananê Tirkîya de mergî qewimîyenê. Nînan ra se ra 13,9î serebûtê xokiştişî yê. Ganî tepişteyê nêweşê kanser, alzheimer û kronîkî zîndan de nêmanê. Taloqkerdişê ceza vera yeno peygoşkerdene. Dezgehê Tipê Edlîyî nêverdano tepişteyê nêweşî bêrê veradayene. Nê dezgehî ser o tedaya sîyasîye esta. Coka tepişteyî ya seteret de yan zî zereyê tabutî de vera dîyenê.”

Gergerlîogluyî vist vîrî ke Aysele Tugluk rixmo ke nêweşa demansî ya hema zî zîndan de ya û pare kerd ke veradayîşê Aysele Tugluk zî hetê Dezgehê Tipê Edlîyî ra ameyo astengkerdene.

Gergerlîogluyî vat: ”Zîndanê Wanî de Şervan Can Guderê 20 serrî depresyonî ra xo kişto, nêweşê giranî Sînan Kayayê 28 serrî zî xo kişt. Ma zîndanan ra zaf muracatan gênê. Zîndanan de dramê pîlî qewimîyenê. Tepişteyî pêşkêşê mergî yenê kerdene. La serê her çî yeno girewtene. Pêro raporê tepişteyanê nêweşan goreyê huqûqê dişmenîye ameyê amadekerdene. Raporê Aysele Tugluk mîsalê ney o tewr pîl o. Raporê Aysele Tugluk pê sûcdarîkerdişan dekerde yo. Yanî sîyaset tîya de zî serdest o. Beno ke zaf kesî bixelisîyayêne la ê merdimî destê ma ra şîyî.”