Bombayanê dewleta tirke bajarekê Akçelerî yê vaşûrê Kurdîstanî de 5 kesî qetil kerdî.
Goreyê xebera Rojnewsî dewleta tirke bajarekê Akçelerî yê vaşûrê Kurdistanî hewayî ra da bombayan ver, 5 kesî ameyî qetilkerdene.
Goreyê çimeyanê asayîşî yê Çemçemalî ewro saetanê serê sibayî de mabênê dewanê Celemord û Tuteqelî yê bajarekê Akçelerî de vera wesayîtêkî hêriş ame kerdene. Hêriş de 5 kesî şehîd bîyî kesêk zî dirbetin bî. Dîya zanayene ke di kesê ke ameyî qetilkerdene dewa Tuteqelî ra yê û nameyê înan wina yê: Muxtarê dewa Tuteqelî Aram Haci Kake Xan û Îsmaîl Îbrahîm.
Ame eşkerakerdene ke hêriş pê teyarayanê şerî yê dewleta tirke ame kerdene.
