Talîbanî bado ke xeylê bajar û qezayan vist binê kontrolê xo, rayraberdişê xo îlan kerd û eşkera kerd ke do welat pê rayraberdişê şerîatî bêro rayraberdene. Talîbanî peynîya hezîrane de berê sînorî yê Şîr Han Bedereyî yê Tacîkîstanî zî vistbî dest ke têkilîyê ekonomîkî ê înan hêz bibo. Goreyê malumatanê ke selahîyetdaranê NATOyî da Reutersî, badê dagirkerdişê paytextê Afganîstanî ê Talîbanî Kabul de 18 hezarî ra zêde kesî bi rayîrê hewayî mecbur mende ke koç bikerê. Na çarçewa de nizdîbîyayîşê vera krîzî ê rojawanî ame rexnekerdene û dîya zanayene ke DYA sozê hewldayîşê texlîyakerdişî dayo.
Xebere de ame vatene ke Talîban vato merdimê ke belgeye înan ê gêrayîşî çinîyo wa agêrî keyeyanê xo, la reyna zî welat de bi hezar merdimî seba remayîşî teyaregehan dekerdî.

Teyare esto la texlîya çinî ya

Goreyê xebera ke Associated Pressî (AP) de vejîya, DYA seba texlîyakerdişa amerîkayij û afgananê ke Teyaregehê Kabulî de yî, mîyanê hewldayîşan de yo. Her çiqas ke 31ê tebaxe nizdî bibo zî bi hezaran merdim paweno ke bi rayîrê hewayî welat ra biremî.
Goreyê eşkerayîya ke Verfekê Wezîrîya Teberî yê DYAyî Ned Prîce da, roja panşeme 6 hezar merdim texlîya bîyî û yeno pawitene ke saetanê vernî de pê teyareyanê leşkerî texlîyakerdişê bi hezaran merdiman virazîyo. Verfekê Pentagonî John Kirbyî da zanayene ke 2 rojanê peyênan de 2 hezar rayvanî firayî. Kirbyî dîyar kerd ke teyareyê artêşa DYAyî estê ke roje de mabenê 5 hezar û 9 hezaran de merdiman texlîya bikerê, la heta roja panşeme hîna tay texlîyayî resayî teyaregeh.

Goreyê xebera ke United Press Înternationalî de ca girewt, Serekê DYAyî Joe Biden vato ke seba asayîşê hemwelatîyanê amerîkayijan do artêşa DYAyî ra grubêka şenik heta 31ê tebaxe Afganîstan de bimana.
Parlementoya DYA ra Mitch McConnell û Kevin McCarthy dîyar kerdî ke ganî derheqê Afganîstanî de malumatê hîna bi detay bidîyo. ANQARA