Polen Ekolojî ra Tugba Kahramane bêtera Licikî rexne kerde û wina qisey kerd: ”Sîyanur û madeyê kîmyewî yê giranî do tewrê Firatî bibê. Felaketê Licikî do tewr tay 100 serran dewam bikero.”

Tugba Kahramane îfade kerd ke zehmet o ke bîlançoya ekoqirkerdişî ya nê felaketî bêra texmînkerdene û vat: “Sîyanur û madeyê kîmyewî yê giranî do tewrê Firatî bibê. Felaketê Licikî tewr tay do 100 serran dewam bikero. Erdo jehrîn ver bi çep û raştî vila bî. Dima ke varan vara zî derbazê binê erdî bî. Nika herême de pêro heywan, însan û gandarî binê tehlukeyî de yê. Tesîranê vilabîyayîşê sîyanurî ra nêweşîyê sey KOAH û kanserî do neslanê neweyan de rîbidê.”

Tugba Kahramane ard ziwan ke Tirkîya vurîyaya warê çopan ê Yewîya Ewropa û vat: “Şuxilnayîşê sîyanur û asbestî yo winayên mojneno ke sermaye seba qezençkerdişî heqê cuye yê merdiman û pêro gandaran erzena binê tehlukeyî û dewlete zî sermayedaran de têkilîya xurte mîyan de ya. Meseleya ekolojîke meseleyêk a ke rîyê kapîtalîzmî ra qewimîyena. Bi xurtkerdişê têkoşînî ma eşkenê verê qirkerdişê ekolojîkî bigêrê.”