Nûdem Dûraka ke Şirnex de ciwîyayêne û bi vengê xo yê weşî ameyêne şinasnayîş 22ê nîsana 2015î ra nata tepişte ya. Sebebê tepiştişê Nûdeme zî vatişê deyîranê kurdîyan o. Bi tepiştiş waştî ke vengê Nûdeme bibirnê la bi no hawa verdê asteng bikerê, vengê aye resa temamê dinya. Nûdeme bi kilamanê dengbêjîye, wareyê kultur û edetî de bîye pîl. Botano ke her ware de xo vera çinbîyayîşî de pawito û serê lingan de mendo, bi sewtê Nûdeme lîlyan dayêne. Helbet Nûdeme têna bi vengê xo nê, eynî wextî de merkezê kulturî de tutan rê mamosteyîye kerdêne û çîyê ke zanayêne neql kerdêne. La no aktîfbîyayîş û berhemdarîya ci hukmat aciz kerd. Çike goreyê hukmatî ganî kes vengê xo, rengê xo, bîyayîşê xo nîşan nêdo.

Verê ra heta nika polîtîkayê asîmîlasyonî, qirkerdişî seba kurdan falîyetê ci dewam de yê. Goreyê hukmatî kurdo ke bêveng o, nasnameyê xo ra dûrî yo, kulturê xo ra fek vera dano û xo înkar keno kurdo baş o. Kesê ke wayîrê ziwan, nasname û kulturê xo vejîyayê, çuwaya xo serê înan de kêm nêkerde û yan ê eştê zîndanan, yan zî qetil kerdê. Înan ra tewr tehlukeyo pîl xobîyayîş û xonaskerdiş o. Taybetî zî hetê hunerî ra. Serranê 90an de şarî nêeşkayî ke kasetanê hunermendanê kurdîyan bi rehetî goşdarî bikerê. Kasetê Şivan Perwer, Koma Berxwedan û sewbîna hunermendan tim lîsteyê qedexeyî de bîyî. Keyeyê ke nê kasetî tede bîyî hetê hukmatî ra hem teda dîyêne û hem zî erzîyayêne zîndan. Reyna zî şarî goşdarîkerdişê xo ra fek vera nêdayêne. Şarêko bi înad, bi bawer vernîya kerdişanê înan de bî. La ewro roj gama ke ma ewnîyenê, hema zî polîtîkayêke wina hemverê hunermendanê kurdan de dewam de ya. Gelo çira hende vera hunerî de ters û lerzê înan esto? Huner wina çîyêk ke yo, eşkeno fikr, ruh û bedenî ser vurnayîşan bikero. Reaksîyonan bido ramojnayîş û tesîrê xo serê komelî de xeylêk esto. Coka tim îdarekarî wazenê ke huner binê tekelê înan de bo. Destûrê înan ancax hunerê ke ê qebûl kenê rê yo. Destekê înan zî reyna ê kesan ra yo. Yanî îdarekerdoxî vanê ke şima eşkenê ancax hunerê ke ma qayîl benê bikerê. Sewbîna tu hewa tehemulê înan çin o. Nûdeme zî nê hunermendan ra ya ke vera teda û vera qirkerdişê kulturî ra sere wedarita. Bêtehemulîyê înan tewr zêde no yo.
Gama ke merdim ewnîyeno kerdişanê hukmatî ra zano ke hunerê kurdî çend girîng o. Coka ma hem wayîrê hunermendanê xo û hem zî wayîrê hunerê xo vejîyê. Eke ma înan rê wayîr nêvejîyê, na xirabî resena amancê xo. Zîndananê Tirkîya de ewro bi seyan hunermendî estê. Sebebê tepiştişê înan zî yan rastîyî xêz kerdê, yan rastîyî bi vengê xo ardê ziwan, yan rastîyî nuştê. La hukmat çîyêk keno xo vîr ra ke gama wina keno hîna zêde vengê înan resneno dinya. Nînan ra nimûneyê ke ma bidê Zehra Dogan û Nûdem Durake ya.
Zehra Dogan demê qedexekerdişê kuçeyan de seba çîyê ke ameyî kerdiş û ameyê ciwîyayîş xêz kerdî, çend rey ameye tepiştiş. Sebebê tepiştişê aye bê qelem, bê huner veradayîş bî. La Zehra zîndan de zî kerdişanê înan reyna xêz kerd û ramojna ke se bikerê wa bikerê do nêeşkê vernîya hunerî padê. Wina çîyêk bî ke pêro dinya nê zulmî ra haydar bî û wayîrê huner û hunermendan vejîya.

Ewro zî wazenê vengê Nûdeme kuçeyan ra, meydanan ra bibirnê la reyna zî nêresayî amancê xo. Senîn hunermendê kurdî wayîrê Nûdeme vejîyayî, eynî tewir hunermendê dinya zî wayîr vejîyayî. Îdarekarê zîndanî demo ke dest dayî serê gîtara Nûdeme, endamê gruba Pînk Floydî, namdarê dinya ra Roger Waters gîtara xo Nûdeme rê şawite û veng da Erdoganî ke Nûdeme serbest vera bido. Labelê a gîtare zî nêdîyaye Nûdeme. Xeylê hunermendê dinya tepiştişê Nûdeme ra acizîyê xo ardî ziwan û vatî ke ganî seba deyîran, seba hunerî tu hunermend nêro tepiştiş û vernîya ci nêro girewtiş.

Seke ma vînenê tersenê deyîran ra, tersenê Nûdeme ra. Wina tersenê ke 7 serrî yo Nûdeme tepişte û tepişteyêka nêweş a. Nudeme badê ke kewte zîndan, xeylê nêweşî ci de peyda bîyî: nêweşîya helyayîşê esteyan, vînayîşê çiman de problem û guatrê jehrîn. Nê nêweşîyan ra tewr pîl endîşeyê Nudeme, nêweşîya guatrê jehrîn a. Na nêweşî beno ke zirar bido têlê vengê ci. No seba hunermendê vengî rê merdiş ra xirabêr o. Coka wazena tedawîya xo bikera û reyna deyîranê xo vaja. Nûdeme û pêro tepişteyê nêweşî ganî bêrê veradayîş.

Nê aşman de bi desan tepişteyê nêweşî zîndanan de dinyaya xo bedilnayî. Ganî xesasîyetê ma vera nê bibo û ma nêverdê ke zîndanan ra cenazeyî vejîyê. Ma bibê vengê Nûdeme û heme tepişteyan. Ma înan pey dêsan ra, binê tedayî ra bixelesnê. Eke ma serê rayaumumî de vinderê û israr bikerê ma eşkenê xeylêk çîyan bivurnê. Senîn ê tim bî vengê şarî, ma zî bibê vengê înan û azadîya înan biqîrê.