Tirkîya û Kurdistan de terîqetî û cematî seba hêzdarkerdişê rejîmê Erdoganî xebitîyenê. Rixmo ke ê zanê îdareyê Erdoganî de bêrayîrîye, dizdîye û hîlekarîye esta, paştîdayîşî rê dewam kenê. Çike ê bixo xî leteyê rejîmê Erdoganî yê kanperest û sextekarî bîyî. Êdî serekê terîqet û cematan seraya Erdoganî rê berbanîye kenê. Wextê weçînayîşan de zî vengê weçînitoxan danê ke AKPyî rê raye bidê.
Tirkîya û Kurdistan de hetekê îtîqatî ra xeylêk dejenerasyono gird qewimîyeno. Şar domananê xo dano tayê terîqet û cematan. Peynî de domanê ci yenê îstîsmarkerdene. Terîqet û cematî wezîrîyan ser o peran gênê û domananê şarî xapinenê. Ma nika tayê nimûneyan analîz bikerê.
Dakak bizor şirawîya medresa
Çend rojî verî xeberêka muxabîrê Ajansê Mezopotamya Emrullah Acarî weşanîyaye. Riha de keyeyêkî domani ci yê 12 serre bizor di reyî erşawito medresaya ke girêdayîyê Weqfê Semerkantî ya. Lajê keyeyî Abdulbakî Dakak di reyî medresa ra remayo û şîyo keye. Ey qetî nêwaşto uca de perwerde bîgêro. Labelê ma û pîyê ci ey rê ferz kerdo û reyna şirawito. Dakak tewr peynî 13ê hezîrane de medresa ra vejîya teber û ci ra xeberêke nêgêrîyaye. Di rojî dima dîya zanayeke ke lajek axura ke leweyê medresa de ya bi hawayêkê dardebîyayeyî ame dîyene. Otopsî virazîya û ame vatene ke lajekî “xo kişto”. Kam na eşkerayîye ra bawer keno? Tu kes. Hukmat, dewlete, hukm, terîqetî, cematî pêro komelî rê zûran kenê.
Awanîye dîyaye Menzîlî
Weqfê Semerkantî bi destê endamanê cematê Menzîlî ronîya. Medresa hetê Şaredarîya AKPyî ya Eyyubîye ra Goristanê Taxa Beşatî de ameye awankerdene. 29ê êlula 2018î de akerdişê medresa qewimîyabî. Şaredarê Eyyubîye Mehmet Ekîncî û Parlamenterê AKPyî yê Riha Halîl Ozcan zî tewrê akerdişî bîbî. Awanîye de têna medresa nê, kursê Quranî û cayê tazîye zî esto. Awanîye bi destê Şaredarîya Eyyubîye ameye dewrkerdene terîqetê Menzîlî.
Komela Vilakerdişê Îlîmî ya Uzletî
Serebûto ke Riha de bî, têna nîyo. Hema hema her hewte xeberê xirabî dîyenê. Çend hewteyî verî Stenbol de Komela Vilakerdişê Îlîmî ya Uzletî de îstîsmar qewimîya. Serekê Komele Alperen Sadeyî astengdara mentale (E.D.) herimnaye. 15 rojî tepîya astengdara mentale xo kişt. Na komele girêdayîyê Cematê Îsmaîl Aga ya.
Weqfê Hîranurî
Cematê Îsmaîl Agayî de skandal, îstîsmar û herimnayîşî êdî “vilabîyaye” yê. Poyîyayîş nîkile de yo. Verê cû kanûne 2022 de Weqfê Hîranurî de skandalêk peyda bî. Kêneka ronayoxê weqfî H.K.G. derheqê pîyê xo de gerre kerd. Ronayox Yusuf Zîya Gumuşelî kêneka xo serra 6. de bi murîdê xo Kadîr Îsteklîyî “zewecnaye”. Kêneke ameye îstîsmarkerdene. H.K.G.yî îfadeyê xo de vat ke “herimnayîş” sey kayî ame mojnayene. Peynîya nê serebûtan çîn a. Bi kilmî komelê Tirkîya û Kurdistanî dekewto dafika kanperestan. Terîqetî û cematî hem domananê şarî şuxilnenê, hem zî butçeya şarî diznenê.
