Tepişteyo nêweş ê giranî ra Abdulrezzak Şuyurî Zîndanê Şakranî de seba ke nêame tedawîkerdene dinyaya xo bedilnaye
Tepişteyo nêweş ê giranî ra Abdulrezzak Şuyurê 56 serrî Zîndanê Şakranî yê Îzmîrî de dinyaya xo bedilnaye. Şuyu 1993î de Mugla de bi îdîaya ”endamîya rêxistine” amebi tepiştene û cezaya muebede dîyabî ci. Şuyur Sêr û Dîlokî ra dima Zîndanê Şakranî rê amebi surgunkerdene û tede kanserê cigêrî estbi. Şuyurî tewr peyên 2 hewteyî verî lajê xo reyde pêvînayîş kerdbi, a roje ra nata tira xebere nêamebî girewtene.
Birayê ci Muhsîn Şuyur vizêr seba pêvînayîşî şi zîndan. Îdareyê zîndanî verî ke sebebêk vajo nêverda ê pêvînayîşî bikerê. Saetêke dima ke Muhsîn Şuyur zîndanî ra vejîya îdareyî keyeyê Şuyurî rê telefon kerd û vat ke Şuyurî dinyaya xo bedilnaya. Şuyurî serrêke verî waştbi ke vera bidîyo la waştişê ci amebi redkerdene. 14 mengî mendbî ke Şuyur zîndanî ra vejîyo.
Birayê ey Yunus Şuyurî da zanayene ke mengêke verî înan yewbînî dîbî û vat: “Ma persenê: mîyanê mengêke de o senî kewto nê halî? Ma nêzanenê amelîyat bîyo yan nê. 2 hewteyî bi ma tira xebere nêgirewtêne. O nêame pêvînayîşê telefonî zî. Gelo ey xo kişto? Çira merdo? Mergê ey ser o nakokîye esta.”
Merdimanê Şuyurî semedê girewtişê cenaza Stenbol û Sêrtî ra verê xo da Îzmîrî. Cenaza do Sêrt de bêro definkerdene. ÎZMÎR
