Endama Komîsyonê Heqanê Merdiman ê Meclîsî û Parlamentera HDPyî Fatma Kurtulane îfade kerd ke zîndanan de tepişteyî îşkence vînenê û dinyaya xo bedilnenê.
Endama Komîsyonê Heqanê Merdiman ê Meclîsî û Parlamentera HDPyî ya Mersînî Fatma Kurtulane derheqê binpaykerdişê heqanê tepişteyan de ANFyî rê qisey kerd.
Kurtulane pare kerd ke sey Komîsyonê Zîndanan ê her 3 mengan de zîndanan zîyaret kenê û goreyê çimdarîyanê înan zîndanan de binpaykerdişê heqan resayê astêka cidîye. Kurtulane vat: “Wextê nê zîyaretan de ma raporan amade kenê. Tekîrdag de tepişte Vedat Erkmenî xo kişto. Embazanê ci yê koxûşî vat ke endamê ‘îstîxbaratî’ çend reyî ameyê, înan Erkmen veto teber û ci rê ajanîye ferz kerda. Zîndanan de zaf tepişteyî seba ke nênê weşkerdene dinyaya xo bedilnenê û vajîyeno ke nînan xo kişto. Sebebê ci çi beno wa bibo mesuldarê nê mergan Wezîrîya Edaletî ya. Zîndanan de kerdişê sey bi kelemçe tedawîkerdiş, payan ser de hûmaritiş, astengkerdişê pêvînayîşan resayî asta îşkenceyî. Wexto ke tepişteyî vera nê kerdişan vejîyê zî raştê şîdetî yenê. Tepişteyê nêweşî zî vanê ‘ma erey sewqê revîrî benê, derman nêdîyeno ma, muayene wextê xo de nêno kerdene. Tepişteyê nêweşî bi nê hawayî terkê mergî benê. Reyna tepişteyanê sîyasîyan rê polîtîkaya çokdayîşî û çinkerdişî yena ferzkerdene, nê tepişteyî keyeyanê xo ra yenê dûrkerdene.”
Kurtulane vist vîrî ke Zîndanê Sîlîvrî de tepişteyêko edlî hêrişê gardîyanan de ame qetilkerdene û vat: “Derheqê serebûtî de tehqîqat zî nêame akerdene. Wezîrîya Edaletî û Mudirê Sîlîvrî agahîyê cîyayî dayî.”
Kurtulane bale ante Rayraşîyayîşê Gemlîkî yê vera tecrîdê Îmraliyî ser û vat: “Seba ke Tirkîya bira şerî daya, Abdullah Ocalan bi giranî yeno tecrîdkerdene. Tirkîya demokrasî, heq, huqûq pêro eştî kişte û şer de israr kena. Tecrîdê Îmraliyî zî na çarçewe de yeno girankerdene.”
