Heta nika Heyetê Îmrali 5 reyî şî Girawa Îmrali û Serekê PKK’yî Abdullah Ocalanî reyde pêvînayîşê girîngî kerdî. Têgêrayîşê Azadîya Kurdî seba çareserîya persa kurde û demokratîkbîyayîşê Tirkîya mîyanê 6 aşman de xeylê gamê şênberî eştî. Çike seba Têgêrayîşê Azadîye raison d’etre çareserkerdişê persanê Tirkîya û Kurdîstanî yê serekeyan o. Gama ke pêvînayîşan dest pê kerd, rayapêroyîya Tirkîya desinde propagandaya sîyaye kerde û vat ke “Têgêrayîşê Azadîya Kurdî birastî nêwazeno ke problemî bêrê çareserkerdene û coka o do çekanê xo merono.” Labelê se bî, pêro guman û propagandayê sîyayî pûç bîyî.
Verî Serekê PKK’yî Abdullah Ocalanî mesuldarîya xo arde ca û 27ê sibate de vengdayîşê xo yê Aştîye û Komelê Demokratîkî de îradeyêko pîl ramojna. Ey bi kilmî vat ke wa Tirkîya, Kurdîstan û heme Rojhelatê Mîyanênî de ganî komelêko newe yanî komelêko demokratîk bêro awankerdene. Yanî komelo ke hetê huqûqî, demokrasî, edalet û heqanê merdiman ra wayîrê hemwelatîya têduşte yo bêro awankerdene. Ocalanî baxusus bale ante wayûbirayîya şaran û aştîye. Ey ard ziwan ke wa PKK çekanê xo rono û xo betal bikero. Nê konteksî de rayapêroyîya Tirkîya reyna guman kerd ke PKK pêşnîyazanê Ocalanî goşdarî nêkeno. Labelê demî yewna mojna ke rayapêroyîya Tirkîya neheq vejîyaye. Netîce de PKK’yî gulane 5-7î de kongreya xo ya 12. kerde û îlan kerd ke o do çekanê xo rono.
Mesuldarîye û gamê şênberî
Kurdan heta nika wadê xo tepişt û gamê ke çarenûsê na cografya bedilnenê, eştî. Nika ganî hukmat û muxalefet mesuldarîye bigero destê xo û tayê gaman bierzo. Gelo nê gamî çi yê? Mîyanê nê gaman de viraştişê qanûnê bingeyî yê neweyî, ziwanê dayîke de perwerde, hemwelatîya têduşte, naskerdişê estbîyayîşê bawerîyanê sewbînan, qednayîşê cinsîyetperestîye û pêro tepişteyanê sîyasîyan rê azadîye est ê.
Hûmara zîndan û tepişteyan
Seke zanîyeno Tirkîya û Kurdîstan de mîyanê 20 serran de hûmara zîndanan xeylê zêdîyaye. Yeno texmînkerdene hûmara tepişteyan 6 qatî zêdîyaye. Goreyê dayeyanê peyênan nê welatî de 396 zîndanan de pêro pîya 410 hezar tepişteyî vindenê. Hema hema 352 hezar tepişteyî hukmwerde yê, 57 hezar tepişteyî zî tepişîyayî. Fekafek şaristanê sey Çewlîg zîndan de yo. Na hûmare bêguman goreyê welatanê bînan ê Ewropa zaf berz a. Nê îstatîstîkî nîşan danê ke Tirkîya de tedaya girde est a. Rejîmo despotîk seba ke xo bipawo, hertim vera bindestan teda şuxilneno. Tirkîya de zî hişmendîya winayêne est a. Nê prosesê aştîye û komelê demokratîkî de komel paweno ke zîndanan de bitaybetî rewşa tepişteyan bibedilîyo.
Koyî merre ard dinya
Rixmo ke Partîya DEM’î seba bedilîyayîşê qanûnê înfazî pêvînayîşî kerdî, netîceya şênbere nêgêrîyaye. Wekîlê Serekê Grûba DEM’î Sezaî Temellî da zanayene ke hukmat giran têgêreno. Rayapêroyî pawitêne ke Roşanê Qurbanî de paketê hukmî bivejîyo, la hukmatê AKP’yî vetişê paketê hukmî taloq kerd û îfade kerd ke no paket payîzî bêro vetene. Temellî na rewşe wina pênas kerde: “Koyî merre ard dinya”. Raştî zî xeyalê komelî şikîya. Bitaybetî tepişteyê nêweşî lezabez nê paketî pawenê. La hukmat tepişteyan “xecelneno” û mesuldarîyanê xo nêyano ca. Îdarekarê dewlete hetêk ra qalê ravurîyayîşê demokratîkî kenê, hetekê bînî ra reftarê xo yê tedakerî domnenê.
