Soydan Akayo ke 31 serrî yo zîndan de yo, bi bahaneyanê Heyetê Îdare û Çimdarîye vera nêdîyeno.

Heyetê Îdare û Çimdarîye derheqê Akayo ke 2008 ra nata hucreyê yewkesî de tepişîyeno de raporê ‘rêxistina terorî ra anêbirîyayo’ da.

Rapor de ame îdîakerdene ke Akay endamanê rêxistine yê tepişteyan de mîyanê têkilîyan de yo, kitabê bi tedeyîya tehlukeyîne wendê û derheqê wasîyê ci de zî endamîya rêxistine ra dewa ameya akerdene.

Avûkata Akayî Hemsereka OHDyî ya Stenbolî Esra Bîlene û birazîya ci Kivilcim Akaye derheqê babete de ANFyî rê qisey kerd.

Esra Bîlen ard ziwan ke heqê Akayî bi hawayêkê sîstematîkî yenê binpaykerdene û vat: “Na rewşa vêşnayîşê înfazan yena sereyê xeylêk tepişteyanê sîyasîyan. Tepişteyî bi biranê mehkemeyan kewenê zîndanî la ancax bi biranê Heyetê Çimdarîye û Îdareyî eşkenê zîndanî ra vejîyê. Birê raporî yê heyetî goreyê huqûqî nîyê. Astengkerdişê tehlîyeya Akayî binpaykerdişê heqan o.”

Birazîya Akayî Kivilcim Akaye pare kerd ke bi veranêdîyayîşî keyeyê Akayî zî yeno cezakerdene û vat: “Nê kerdişî mojnenê ke huqûq nêmendo. Apê mi de xeylêk nêweşîyî est ê. Ma qaşo tebaxe de tehlîyeya ey pawitêne la ancî ma ameyî cezakerdene. Hewteyê peyênî de ancî ma ameyî cezakerdene. Ez domanîya xo ra nata mîyanê nê prosesan de ya. Mi rê giran o ke hema zî welat de çîyêk nêvurîyayo.”