Cemîle Anlaşa ke kênaya ci Ayten Anlaşe Zîndanê Bakirkoyî de tepişîyena îfade kerd ke 10 serrî yo a kênaya xo têna 2 reyî dîye û waşt ke kênaya ci zîndanêkê nêzdîyêrî rê bêra sewqkerdene.
Ayten Anlaşe 2012 de Stenbol de tepişîyaye û cezaya zîndanî ya 21 serran dîyaye ci. Ayten Anlaşe Zîndanê Bakirkoyî de tepişîyena.
Dadîya Ayten Cemîle Anlaşa 90 serre qezaya Pêrtagî ya Dêrsimî de ciwîyena. Dayîke Cemîle 10 serran de têna di reyî eşkeye kênaya xo bivîna. Anlaşe seba ke sewqê Zîndanê Xarpêtî biba 4 waştişnameyî dayî la waştişnameyî ameyî redkerdene.
Anlaşe seba ke waştişê ci qebul bibî Wekîlê HDPyî Omer Faruk Gergerlîogluyî ra hetkarîye waşte. Gergerlîogluyî derheqê babete de yew waştişname da Serekîya Komîsyonê Cigêrayîşî û persnameyêk zî da Wezîrê Edaletî Bekîr Bozdagî.
Waka Aytene Întîzare Anlaşe waya ci seba ke dadîya înan nêweş û kokim a sewqê xo waşt. Întîzara Anlaş vat: ”Dadîya mi 10 serran de 2 reyî waya mi dîye. Tewr peyên 6 serrî verî dadîya mi a dîye. Dadîya mi nêweş a û nêeşkena şora pêvînayîşî. Destûr nêdîyeno ke waya mi pêvînayîşê akerdeyî de bi rehetî têbigêra, derheqê ci de teqhîqatê dîsîplînî esto. No metodê teda yo.”
Dayîke Cemîle Anlaşe zî waşt ke kênaya ci nêzdîyê zîndanêkê nêzdîyêrî biba û vat: ”Wa bêra nêzdîye. Çend serrî yo mi rîyê ci nêdî. Beno ke ez aye bivîna nêşinasnena. Hêvî kena ke kênaya mi yena nêzdîyê mi.” DÊRSIM
