Hemsereka DEM Partî ya Amedî Pinar Sakik Tekîne şewatê Amed û Mêrdînî sey felakete name kerd û vat berpirsîyarê şewatî DEDAŞ o.

Şewatê mabênê Amed û Mêrdînî de yo ke 20ê hezîrane de vejîya tesîrê warê 66 kîlometreyî kerd. Şewat de 15 kesan dinyaya xo bedilnaye û 78 kesî birîndar bîyî.

Hemsereka DEM Partî ya Amedî Pinar Sakik Tekîna ke derheqê şewatî de ANFyî rê qisey kerd, vat îxmal û bêtedbîrîye ra na bêtere qewimîyaye.

Tekine nê vatî: ”Ma bi pêro awanîyanê xo vazdayî gazîya şarê xo. Ma paştî daye, dejê ci pare kerd. Dejê şarê ma dejê ma yo. No qeder nîyo. Xora DEDAŞ bîyo belayê sereyê şarê ma. Bi sûcdarkerdişê şarî ê nêeşkenê mîyanê na babete ra bivejîyê. Çi heyf ke na felakete rîyê îxmal û bêtedbîrîya DEDAŞî ra qewimîyaye. Rixmê heme hîşyarkerdişê şarê ma DEDAŞî goş nêda şarî û tedbîrî nêgirewtî.

Hetkarîya dewlete badê 12 saetan resaye warê şewatî. Ma erdlerz de zî dî 36 saete cuwa pê cewab da. Na felaketa şewatî de zî badê 12 saetan kerd ke bibo cewab la cewabo qîmkerde nêbî. Bitaybetî cografyaya Kurdistanî de nizdîbîyayîşê dewlete yê bêxemî ser o ma firkîyenê. Felaketan de zî cîyakerîye est a. Gama ke zirar dîyeno kurdan û Kurdistanî, dewlete wayîr nêvejîyena.”