Taxa Çûlî ya qezaya Rezanî ya Amedî de Narîn Gurana 8 serre amebî qetilkerdene.
Komîsyonê Huqûqî yê DEM Partî bi gerrenameyî muracatê Serdozgerîya Komare kerd û waşt ke înanê ke tehqîqatê qetilkerdişî asteng kerdo û delîlê nimitî wa bêrê cigêrayene.
Derheqê babete de Hemvervatoxa Komîsyonê Huqûqî Sevda Çelîk Ozbîngole verê serdozgerîye de eşkerayîye daye.
Ozbîngole vist ke Parlamenterê AKPyî Galîp Ensarîogluyî vatbî ke ”Ge ge merdimî tayê çîyan zanenê la nînan nêanê ziwanî.” Ozbîngole bale ante ser ke nê qiseyan ra zî eşkera yo ke delîlê dosya ameyê çinkerdene.
Ozbîngole bale ante ser ke ganî têkilîya mabênê verguman Salîm Guran û Ensarîogluyî bêra cigêrayene û qeydê HTSyî bêrê tesbîtkerdene.
